kis ne kaha ki mujhko ye duniya nahin pasand

kis ne kahā ki mujh ko ye duniyā nahīñ pasand

bas sāmne kā thoḌā sā hissa nahīñ pasand

barsoñ se is ke saath guzar kar rahe haiñ ham

har-chand zindagī kā ravayya nahīñ pasand

sūraj tulūa hote hī dar band ho ga.e

ye kaise log haiñ ki saverā nahīñ pasand

ḳhvāhish to hai mujhe bhī ki manzil mile magar

yuuñ dūsroñ kī raah pe chalnā nahīñ pasand

maiñ jāntā huuñ jaan hī le legī tishnagī

lekin mujhe ḳhushāmad-e-dariyā nahīñ pasand

tārīf kar rahe the sabhī ziist kī 'salīm'

maiñ ne bhī kuchh qarīb se dekhā nahīñ pasand

kis ne kaha ki mujh ko ye duniya nahin pasand

bas samne ka thoDa sa hissa nahin pasand

barson se is ke sath guzar kar rahe hain hum

har-chand zindagi ka rawayya nahin pasand

suraj tulua hote hi dar band ho gae

ye kaise log hain ki sawera nahin pasand

KHwahish to hai mujhe bhi ki manzil mile magar

yun dusron ki rah pe chalna nahin pasand

main jaanta hun jaan hi le legi tishnagi

lekin mujhe KHushamad-e-dariya nahin pasand

tarif kar rahe the sabhi zist ki 'salim'

main ne bhi kuchh qarib se dekha nahin pasand