kis qadar KHush-nasib hote hain

kis qadar ḳhush-nasīb hote haiñ

jo sharīf-o-najīb hote haiñ

kyā nahīñ hote qābil-e-izzat

dahr meñ jo ġharīb hote haiñ

be-ḳhirad dostoñ se to behtar

haañ raqīb-e-labīb hote haiñ

dar pe ab sā.iloñ kī dastak se

sad pareshāñ mujib hote haiñ

jaan lete haiñ jo marīzoñ kī

kyā vo qātil tabīb hote haiñ

kyoñ mohabbat kī raah meñ hī sadā

ġham hī paiham nasīb hote haiñ

log bas un ko takte rahte haiñ

zāhiran jo shabīb hote haiñ

sarfarāzī unhīñ ko miltī hai

vo jo ahl-e-shakīb hote haiñ

duur rah kar bhī zāhiran kuchh log

dil ke behad qarīb hote haiñ

gulsitān-e-adab meñ ai 'nūrī'

naġhma-ḳhvāñ bas adiib hote haiñ

kis qadar KHush-nasib hote hain

jo sharif-o-najib hote hain

kya nahin hote qabil-e-izzat

dahr mein jo gharib hote hain

be-KHirad doston se to behtar

han raqib-e-labib hote hain

dar pe ab sailon ki dastak se

sad pareshan mujib hote hain

jaan lete hain jo marizon ki

kya wo qatil tabib hote hain

kyon mohabbat ki rah mein hi sada

gham hi paiham nasib hote hain

log bas un ko takte rahte hain

zahiran jo shabib hote hain

sarfaraazi unhin ko milti hai

wo jo ahl-e-shakib hote hain

dur rah kar bhi zahiran kuchh log

dil ke behad qarib hote hain

gulsitan-e-adab mein ai 'nuri'

naghma-KHwan bas adib hote hain