kis qadar tha garm nala bulbul-e-nashad ka

kis qadar thā garm naala bulbul-e-nāshād kā

aag phūloñ meñ lagī ghar jal gayā sayyād kā

sahl samjhā thā satānā bulbul-e-nāshād kā

chaar nāloñ meñ kalejā hil gayā sayyād kā

zer-e-ḳhanjar maiñ taḌaptā huuñ faqat is vāste

ḳhuun merā uḌ ke dāman-gīr ho jallād kā

dar-pa.e-āzār pahle āsmāñ itnā na thā

pā gayā hai kuchh ishāra us sitam-ījād kā

ab to vo bhī loT hai bulbul tirī āvāz par

bārak-allāh ḳhuub phāñsā tū ne dil sayyād kā

us ke sadqe jā.iye jis ne tujhe paidā kiyā

shakl dī hūr-o-parī kī dil diyā jallād kā

vasl meñ kaisā adab ai jaan gustāḳhī muaaf

aaj lenā hai mujhe tum se evaz bedād kā

aap bhī ḳhanjar-ba-kaf haiñ maiñ bhī huuñ sīna-sipar

rah na jaa.e aaj koī hausla bedād kā

mujh ko hai aisā chaman darkār jis meñ ai 'jalīl'

ḳhauf gulchīñ kā na ho khaTkā na ho sayyād kā

kis qadar tha garm nala bulbul-e-nashad ka

aag phulon mein lagi ghar jal gaya sayyaad ka

sahl samjha tha satana bulbul-e-nashad ka

chaar nalon mein kaleja hil gaya sayyaad ka

zer-e-KHanjar main taDapta hun faqat is waste

KHun mera uD ke daman-gir ho jallad ka

dar-pae-azar pahle aasman itna na tha

pa gaya hai kuchh ishaara us sitam-ijad ka

ab to wo bhi loT hai bulbul teri aawaz par

barak-allah KHub phansa tu ne dil sayyaad ka

us ke sadqe jaiye jis ne tujhe paida kiya

shakl di hur-o-pari ki dil diya jallad ka

wasl mein kaisa adab ai jaan gustaKHi muaf

aaj lena hai mujhe tum se ewaz bedad ka

aap bhi KHanjar-ba-kaf hain main bhi hun sina-sipar

rah na jae aaj koi hausla bedad ka

mujh ko hai aisa chaman darkar jis mein ai 'jalil'

KHauf gulchin ka na ho khaTka na ho sayyaad ka