kis roz ilahi wo mera yar milega

kis roz ilāhī vo mirā yaar milegā

aisā bhī kabhī hogā ki dildār milegā

juuñ chāhiye vuuñ dil kī nikālūñgā havas maiñ

jis din vo mujhe kaif meñ sarshār milegā

ik umr se phirtā huuñ liye dil ko baġhal meñ

is jins kā bhī koī ḳharīdār milegā

mil jā.egā phir aap se ye zaḳhm-e-jigar bhī

jis roz ki mujh se vo sitamgār milegā

ye yaad rakh ai kāfir-e-bad-kesh qasam hai

mujh sā na koī tujh ko giraftār milegā

'īmān' na kahtā thā maiñ tujh se ye hamesha

jo shoḳh milegā so dil-āzār milegā

kis roz ilahi wo mera yar milega

aisa bhi kabhi hoga ki dildar milega

jun chahiye wun dil ki nikalunga hawas main

jis din wo mujhe kaif mein sarshaar milega

ek umr se phirta hun liye dil ko baghal mein

is jins ka bhi koi KHaridar milega

mil jaega phir aap se ye zaKHm-e-jigar bhi

jis roz ki mujh se wo sitamgar milega

ye yaad rakh ai kafir-e-bad-kesh qasam hai

mujh sa na koi tujh ko giraftar milega

'iman' na kahta tha main tujh se ye hamesha

jo shoKH milega so dil-azar milega