kis safar mein hain ki ab tak raste nadida hain

kis safar meñ haiñ ki ab tak rāste nādīda haiñ

āsmāñ pe sham.eñ raushan haiñ magar ḳhvābīda haiñ

kitnī nam hai āñsuoñ se ye sanam-ḳhāne kī ḳhaak

ye tavāf-e-gul ke lamhe kitne ātish-dīda haiñ

ye gulistāñ hai ki chalte haiñ tamannāoñ ke ḳhvāb

ye havā hai yā bayābāñ ke qadam larzīda haiñ

ek bastī 'ishq kī ābād hai dil ke qarīb

lekin is bastī ke raste kis qadar pechīda haiñ

aaj bhī har phuul meñ bū-e-vafā āvāra hai

aaj bhī har zaḳhm meñ tere karam poshīda haiñ

aaj ghar ke aa.ine meñ sub.h se ik shaḳhs hai

aur khiḌkī meñ sitāre shaam se pechīda haiñ

rahguzar kahtī hai jaag ai māhtāb-e-shām-e-yār

ham sar-e-bāzār chalte haiñ magar ḳhvābīda haiñ

aa.ine meñ kis kī āñkheñ dekhtā huuñ maiñ 'jamīl'

do kañval haiñ biich paanī meñ magar nam-dīda haiñ

kis safar mein hain ki ab tak raste nadida hain

aasman pe shamen raushan hain magar KHwabida hain

kitni nam hai aansuon se ye sanam-KHane ki KHak

ye tawaf-e-gul ke lamhe kitne aatish-dida hain

ye gulistan hai ki chalte hain tamannaon ke KHwab

ye hawa hai ya bayaban ke qadam larzida hain

ek basti 'ishq ki aabaad hai dil ke qarib

lekin is basti ke raste kis qadar pechida hain

aaj bhi har phul mein bu-e-wafa aawara hai

aaj bhi har zaKHm mein tere karam poshida hain

aaj ghar ke aaine mein subh se ek shaKHs hai

aur khiDki mein sitare sham se pechida hain

rahguzar kahti hai jag ai mahtab-e-sham-e-yar

hum sar-e-bazar chalte hain magar KHwabida hain

aaine mein kis ki aankhen dekhta hun main 'jamil'

do kanwal hain bich pani mein magar nam-dida hain