kis samt le gain mujhe is dil ki dhaDkanen

kis samt le ga.iiñ mujhe is dil kī dhaḌkaneñ

pīchhe pukārtī rahīñ manzil kī dhaḌkaneñ

go tere iltifāt ke qābil nahīñ magar

miltī haiñ tere dil se mire dil kī dhaḌkaneñ

maḳhmūr kar gayā mujhe terā ḳhirām-e-nāz

naġhme jagā ga.iiñ tirī pāyal kī dhaḌkaneñ

lahroñ kī dhaḌkaneñ bhī na un ko jagā sakīñ

kis darja be-niyāz haiñ sāhil kī dhaḌkaneñ

vahshat meñ DhūñDtā hī rahā qais umr bhar

gum ho ga.iiñ bagūloñ meñ mahmil kī dhaḌkaneñ

lahrā rahā hai terī nigāhoñ meñ ik payām

kuchh kah rahī haiñ saaf tire dil kī dhaḌkaneñ

ye kaun chupke chupke uThā aur chal diyā

'ḳhātir' ye kis ne luuT liiñ mahfil kī dhaḌkaneñ

kis samt le gain mujhe is dil ki dhaDkanen

pichhe pukarti rahin manzil ki dhaDkanen

go tere iltifat ke qabil nahin magar

milti hain tere dil se mere dil ki dhaDkanen

maKHmur kar gaya mujhe tera KHiram-e-naz

naghme jaga gain teri payal ki dhaDkanen

lahron ki dhaDkanen bhi na un ko jaga sakin

kis darja be-niyaz hain sahil ki dhaDkanen

wahshat mein DhunDta hi raha qais umr bhar

gum ho gain bagulon mein mahmil ki dhaDkanen

lahra raha hai teri nigahon mein ek payam

kuchh kah rahi hain saf tere dil ki dhaDkanen

ye kaun chupke chupke uTha aur chal diya

'KHatir' ye kis ne luT lin mahfil ki dhaDkanen