kis tabahi ke ye aasar nazar aate hain

kis tabāhī ke ye āsār nazar aate haiñ

dasht meñ bhī dar-o-dīvār nazar aate haiñ

uTh gayā aañkh se parda ki haqīqat badlī

jitne ġham-ḳhvār the ḳhuñḳhār nazar aate haiñ

sab ke chehroñ pe hai ġham ashk haiñ āvāzoñ meñ

dost sab mujh ko adākār nazar aate haiñ

un ke sīnoñ meñ hai tūfān-e-balā āsūda

ye jo sāhil pe subuksār nazar aate haiñ

kyā haqā.eq ne mire sher kā jaama pahnā

vāqiye sab mire ash.ār nazar aate haiñ

kyā ye sab log haiñ ā.īna-e-hairat terā

sab ke ruḳh par tire anvār nazar aate haiñ

apne daftar meñ hai pindār-e-ḳhudā.ī un ko

ye jo aajiz sar-e-darbār nazar aate haiñ

kis tabahi ke ye aasar nazar aate hain

dasht mein bhi dar-o-diwar nazar aate hain

uTh gaya aankh se parda ki haqiqat badli

jitne gham-KHwar the KHunKHar nazar aate hain

sab ke chehron pe hai gham ashk hain aawazon mein

dost sab mujh ko adakar nazar aate hain

un ke sinon mein hai tufan-e-bala aasuda

ye jo sahil pe subuksar nazar aate hain

kya haqaeq ne mere sher ka jama pahna

waqiye sab mere ashaar nazar aate hain

kya ye sab log hain aaina-e-hairat tera

sab ke ruKH par tere anwar nazar aate hain

apne daftar mein hai pindar-e-KHudai un ko

ye jo aajiz sar-e-darbar nazar aate hain