kis taraf se aa rahi hain dard ki purwaiyan

kis taraf se aa rahī haiñ dard kī purvā.iyāñ

aag sī dene lagī haiñ bhīgtī añgnā.iyāñ

maiñ kahāñ thā jab farishtoñ ne ḳhushī insāñ ko dī

kyuuñ mire hisse meñ aa.eñ sirf ashk-ārā.iyāñ

ye shabāb-o-husn terā aur ye nāz-o-adā

TūTtī haiñ donoñ hāthoñ se tirī añgḌā.iyāñ

maiñ kahāñ jā kar chhupūñ ai gardish-e-daurāñ batā

DhūñD letī haiñ mujhe har-jā mirī rusvā.iyāñ

ik shikasta saaz hai aur ik sadā-e-dard-e-dil

ham haiñ tum ho bekasī hai ġham hai aur tanhā.iyāñ

mujh ko chāra do davā mat de maiñ jī kar kyā karūñ

ye duā kar mujh ko Das leñ maut kī parchhā.iyāñ

ham ne kyā sochā thā aur 'sīmāb' ye kyā ho gayā

bajte bajte ruk ga.iiñ kyuuñ sab kī sab shahnā.iyāñ

kis taraf se aa rahi hain dard ki purwaiyan

aag si dene lagi hain bhigti angnaiyan

main kahan tha jab farishton ne KHushi insan ko di

kyun mere hisse mein aaen sirf ashk-araiyan

ye shabab-o-husn tera aur ye naz-o-ada

TuTti hain donon hathon se teri angDaiyan

main kahan ja kar chhupun ai gardish-e-dauran bata

DhunD leti hain mujhe har-ja meri ruswaiyan

ek shikasta saz hai aur ek sada-e-dard-e-dil

hum hain tum ho bekasi hai gham hai aur tanhaiyan

mujh ko chaara do dawa mat de main ji kar kya karun

ye dua kar mujh ko Das len maut ki parchhaiyan

hum ne kya socha tha aur 'simab' ye kya ho gaya

bajte bajte ruk gain kyun sab ki sab shahnaiyan