kis tarah be-mauj aur Khaali rawani se hua

kis tarah be-mauj aur ḳhālī ravānī se huā

be-ḳhabar dariyā kahāñ par apne paanī se huā

baḌh rahī thī ek bastī se mirī begānagī

mas.ala merā na hal naql-e-makānī se huā

apne hone kā mujhe ḳhud hī diyā us ne subūt

āshnā us se usī kī ik nishānī se huā

kah rahā thā vo ki kaise kaT rahe the us ke din

maiñ girafta-dil bahut us kī kahānī se huā

ik jagah kī saaf aur taaza havā achchhī lagī

kuchh ilāj-e-dil vahāñ ke saada paanī se huā

kis qadar ġham-ḳhvār thā vo shahr aur hamdard log

is kā kuchh andāza apnī rā.egānī se huā

rut badal jaane se piilā paḌ gayā farsh-e-chaman

zard peḌoñ kā badan barg-e-ḳhizānī se huā

kar rahā huuñ maiñ zabāñ ko ik banāvaT se rihā

lafz zinda phir mirī sāda-bayānī se huā

mere us ke darmiyāñ jaise kabhī kuchh bhī na thā

aisā 'shāhīñ' bas zarā sī bad-gumānī se huā

kis tarah be-mauj aur KHali rawani se hua

be-KHabar dariya kahan par apne pani se hua

baDh rahi thi ek basti se meri beganagi

masala mera na hal naql-e-makani se hua

apne hone ka mujhe KHud hi diya us ne subut

aashna us se usi ki ek nishani se hua

kah raha tha wo ki kaise kaT rahe the us ke din

main girafta-dil bahut us ki kahani se hua

ek jagah ki saf aur taza hawa achchhi lagi

kuchh ilaj-e-dil wahan ke sada pani se hua

kis qadar gham-KHwar tha wo shahr aur hamdard log

is ka kuchh andaza apni raegani se hua

rut badal jaane se pila paD gaya farsh-e-chaman

zard peDon ka badan barg-e-KHizani se hua

kar raha hun main zaban ko ek banawaT se riha

lafz zinda phir meri sada-bayani se hua

mere us ke darmiyan jaise kabhi kuchh bhi na tha

aisa 'shahin' bas zara si bad-gumani se hua