kis tarah chhoD dun ai yar main chahat teri

kis tarah chhoḌ duuñ ai yaar maiñ chāhat terī

mere īmān kā hāsil hai mohabbat terī

jaane kyā baat hai jalvoñ meñ tire jān-e-jahāñ

yaad aatā hai ḳhudā dekh ke sūrat terī

ab nigāhoñ meñ jachegā na koī rañg-o-jamāl

merī āñkhoñ ko pasand aa ga.ī rañgat terī

apnī qismat pe farishtoñ kī tarah naaz karūñ

mujh pe ho jaa.e agar chashm-e-ināyat terī

haram-o-dair ke jalvoñ se mujhe kyā matlab

shīsha-e-dil meñ utar aa.ī hai sūrat terī

āstāne se tire sar na uThegā merā

mudda.ā ban ke milī hai mujhe nisbat terī

maiñ 'fanā' ho ke pahuñch jā.ūñgā tere dar tak

raah dikhlāne lagī mujh ko mohabbat terī

kis tarah chhoD dun ai yar main chahat teri

mere iman ka hasil hai mohabbat teri

jaane kya baat hai jalwon mein tere jaan-e-jahan

yaad aata hai KHuda dekh ke surat teri

ab nigahon mein jachega na koi rang-o-jamal

meri aankhon ko pasand aa gai rangat teri

apni qismat pe farishton ki tarah naz karun

mujh pe ho jae agar chashm-e-inayat teri

haram-o-dair ke jalwon se mujhe kya matlab

shisha-e-dil mein utar aai hai surat teri

aastane se tere sar na uThega mera

muddaa ban ke mili hai mujhe nisbat teri

main 'fana' ho ke pahunch jaunga tere dar tak

rah dikhlane lagi mujh ko mohabbat teri