kis tarah nala kare bulbul chaman ki yaad mein

kis tarah naala kare bulbul chaman kī yaad meñ

ghis ga.ī us kī zabāñ to shikva-e-sayyād meñ

dād-ḳhvāhoñ kī agar pursish huī roz-e-jazā

sab se pahle ā.eñge ham arsa-e-faryād meñ

kyā lipaT jaa.eñ tirā qāmat samajh kar is ko ham

ye nazākat ye sabāhat hai kahāñ shamshād meñ

kaam māshūqoñ se bhī āshiq ke letā hai ye ishq

kyuuñ na shīrīñ jaan de apnī ġham-e-farhād meñ

dāman-e-dil ai nasīm-e-gulshan-e-jannat na khīñch

lag gayā hai jī hamārā is ḳharāb-ābād meñ

hashr tak bhī khīñch nahīñ sakne kī sūrat yaar kī

gar yūñhī hujjat rahegī mānī-o-bahzād meñ

kūcha-e-jānāñ meñ yaaro kaun suntā hai mirī

mujh se vaañ phirte haiñ lākhoñ daad aur bedād meñ

sher kahnā aap se 'ġhāfil' kabhī aatā nahīñ

umr ik jab tak na khoī ḳhidmat-e-ustād meñ

kis tarah nala kare bulbul chaman ki yaad mein

ghis gai us ki zaban to shikwa-e-sayyaad mein

dad-KHwahon ki agar pursish hui roz-e-jaza

sab se pahle aaenge hum arsa-e-faryaad mein

kya lipaT jaen tera qamat samajh kar is ko hum

ye nazakat ye sabahat hai kahan shamshad mein

kaam mashuqon se bhi aashiq ke leta hai ye ishq

kyun na shirin jaan de apni gham-e-farhad mein

daman-e-dil ai nasim-e-gulshan-e-jannat na khinch

lag gaya hai ji hamara is KHarab-abaad mein

hashr tak bhi khinch nahin sakne ki surat yar ki

gar yunhi hujjat rahegi mani-o-bahzad mein

kucha-e-jaanan mein yaro kaun sunta hai meri

mujh se wan phirte hain lakhon dad aur bedad mein

sher kahna aap se 'ghafil' kabhi aata nahin

umr ek jab tak na khoi KHidmat-e-ustad mein