kise apna banaen koi is qabil nahin milta

kise apnā banā.eñ koī is qābil nahīñ miltā

yahāñ patthar bahut milte haiñ lekin dil nahīñ miltā

mohabbat kā sila īsār kā hāsil nahīñ miltā

vo nazreñ bār-hā miltī haiñ lekin dil nahīñ miltā

tumhārā rūThnā tamhīd thī afsāna-e-ġham kī

zamāna ho gayā ham se mizāj-e-dil nahīñ miltā

jahāñ tak dekhtā huuñ maiñ jahāñ tak maiñ ne samjhā hai

koī tere sivā tārīf ke qābil nahīñ miltā

haram kī manzileñ hoñ yā sanam-ḳhāne kī rāheñ hoñ

ḳhudā miltā nahīñ jab tak maqām-e-dil nahīñ miltā

musāfir apnī manzil par pahuñch kar chain paate haiñ

vo maujeñ sar paTaktī haiñ jinheñ sāhil nahīñ miltā

ham apnā ġham liye baiThe haiñ us bazm-e-tarab meñ bhī

kisī naġhme se ab 'maḳhmūr' sāz-e-dil nahīñ miltā

kise apna banaen koi is qabil nahin milta

yahan patthar bahut milte hain lekin dil nahin milta

mohabbat ka sila isar ka hasil nahin milta

wo nazren bar-ha milti hain lekin dil nahin milta

tumhaara ruThna tamhid thi afsana-e-gham ki

zamana ho gaya hum se mizaj-e-dil nahin milta

jahan tak dekhta hun main jahan tak main ne samjha hai

koi tere siwa tarif ke qabil nahin milta

haram ki manzilen hon ya sanam-KHane ki rahen hon

KHuda milta nahin jab tak maqam-e-dil nahin milta

musafir apni manzil par pahunch kar chain pate hain

wo maujen sar paTakti hain jinhen sahil nahin milta

hum apna gham liye baiThe hain us bazm-e-tarab mein bhi

kisi naghme se ab 'maKHmur' saz-e-dil nahin milta