kise KHabar jab main shahr-e-jaan se guzar raha tha

kise ḳhabar jab maiñ shahr-e-jāñ se guzar rahā thā

zamīñ thī pahlū meñ sūraj ik kos par rahā thā

havā meñ ḳhushbueñ merī pahchān ban ga.ī thiiñ

maiñ apnī miTTī se phuul ban kar ubhar rahā thā

ajiib sargoshiyoñ kā aalam thā anjuman meñ

maiñ sun rahā thā zamāna tanqīd kar rahā thā

vo kaisī chhat thī jo mujh ko āvāz de rahī thī

vo kyā nagar thā jahāñ maiñ chup-chāp utar rahā thā

maiñ dekhtā thā ki uñgliyoñ meñ diye kī lau hai

maiñ jāgtā thā ki rañg ḳhvāboñ meñ bhar rahā thā

ye baat alag hai ki maiñ ne jhāñkā nahīñ galī meñ

ye sach hai koī sadā.eñ detā guzar rahā thā

ye chand be-harf-o-saut ḳhāke mirā asāsa

maiñ jin ko ġhazloñ kā naam de kar sañvar rahā thā

zamāna shabnam ke bhes meñ aayā aur duā dī

maiñ zard-rut meñ jab apnī bāhoñ meñ mar rahā thā

mujhe kisī se naqab-zanī kā ḳhatar nahīñ thā

maiñ 'aḳhtar' apne hī jasad-e-ḳhākī se Dar rahā thā

kise KHabar jab main shahr-e-jaan se guzar raha tha

zamin thi pahlu mein suraj ek kos par raha tha

hawa mein KHushbuen meri pahchan ban gai thin

main apni miTTi se phul ban kar ubhar raha tha

ajib sargoshiyon ka aalam tha anjuman mein

main sun raha tha zamana tanqid kar raha tha

wo kaisi chhat thi jo mujh ko aawaz de rahi thi

wo kya nagar tha jahan main chup-chap utar raha tha

main dekhta tha ki ungliyon mein diye ki lau hai

main jagta tha ki rang KHwabon mein bhar raha tha

ye baat alag hai ki main ne jhanka nahin gali mein

ye sach hai koi sadaen deta guzar raha tha

ye chand be-harf-o-saut KHake mera asasa

main jin ko ghazlon ka nam de kar sanwar raha tha

zamana shabnam ke bhes mein aaya aur dua di

main zard-rut mein jab apni bahon mein mar raha tha

mujhe kisi se naqab-zani ka KHatar nahin tha

main 'aKHtar' apne hi jasad-e-KHaki se Dar raha tha