kise KHabar thi hawa rah saf karte hue

kise ḳhabar thī havā raah saaf karte hue

merā tavāf karegī tavāf karte hue

maiñ aisā hañs rahā thā e'tirāf karte hue

ki vo to ro paḌā mujh ko muaaf karte hue

ab is se baḌh ke mohabbat kā kyā sila miltā

vo merā ho gayā sab ko ḳhilāf karte hue

bas ek pyaar ne sālim rakhā hameñ yaaro

raqīb mar ga.e ham meñ shigāf karte hue

use manāne meñ ham ne gañvā diyā us ko

ki shīsha TuuT gayā dhuul saaf karte hue

hamārī niiñd ke pīchhe chhupī hai tābānī

charāġh so ga.e ye inkishāf karte hue

kise KHabar thi hawa rah saf karte hue

mera tawaf karegi tawaf karte hue

main aisa hans raha tha e'tiraf karte hue

ki wo to ro paDa mujh ko muaf karte hue

ab is se baDh ke mohabbat ka kya sila milta

wo mera ho gaya sab ko KHilaf karte hue

bas ek pyar ne salim rakha hamein yaro

raqib mar gae hum mein shigaf karte hue

use manane mein hum ne ganwa diya us ko

ki shisha TuT gaya dhul saf karte hue

hamari nind ke pichhe chhupi hai tabani

charagh so gae ye inkishaf karte hue