kisht-e-dil viran sahi tuKHm-e-hawas boya nahin

kisht-e-dil vīrāñ sahī tuḳhm-e-havas boyā nahīñ

ḳhvāhishoñ kā bojh maiñ ne aaj tak Dhoyā nahīñ

us kī āñkhoñ meñ bichhā hai surḳh tahrīroñ kā jaal

aisā lagtā hai ki ik muddat se vo soyā nahīñ

ḳhvāb kī anjān khiḌkī meñ nazar aayā thā jo

zehn ne us chehra-e-mānūs ko khoyā nahīñ

ek muddat par mile bhī to na milne kī tarah

is tarah ḳhāmosh ho muñh meñ zabāñ goyā nahīñ

maiñ ne apnī ḳhvāhishoñ kā qatl ḳhud hī kar diyā

haath ḳhūn-ālūd haiñ in ko abhī dhoyā nahīñ

dekh kar hoñToñ pe mere muskurāhaT kī lakīr

vo samajhte haiñ ki 'aslam' maiñ kabhī royā nahīñ

kisht-e-dil viran sahi tuKHm-e-hawas boya nahin

KHwahishon ka bojh main ne aaj tak Dhoya nahin

us ki aankhon mein bichha hai surKH tahriron ka jal

aisa lagta hai ki ek muddat se wo soya nahin

KHwab ki anjaan khiDki mein nazar aaya tha jo

zehn ne us chehra-e-manus ko khoya nahin

ek muddat par mile bhi to na milne ki tarah

is tarah KHamosh ho munh mein zaban goya nahin

main ne apni KHwahishon ka qatl KHud hi kar diya

hath KHun-alud hain in ko abhi dhoya nahin

dekh kar honTon pe mere muskurahaT ki lakir

wo samajhte hain ki 'aslam' main kabhi roya nahin