kisi banjar taKHayyul par kisi be-ab rishte mein

kisī banjar taḳhayyul par kisī be-āb rishte meñ

zarā Thahre to patthar ban ga.e ahbāb raste meñ

sarāboñ kī galī hai yā tire gaañv kā konā hai

lagā hai ḳhaak par shīshe kā ik tālāb raste meñ

abhī kuchh der pahle paañv ke nīche na the bādal

abhī phailā ga.ī haiñ terī āñkheñ ḳhvāb raste meñ

mirī tayyāriyāñ mere safar meñ ho ga.iiñ haa.il

kabhī ta.avīz baazū par kabhī mehrāb raste meñ

samundar apne markaz meñ khiñchā hai merī āñkhoñ kā

so ab mumkin nahīñ hai roknā sailāb raste meñ

maiñ kaafī der pahle jis ko ghar meñ chhoḌ aayā thā

khaḌā hai muñh phulā.e ab vahī mahtāb raste meñ

safar āsāñ nahīñ hotā kamar pe laad kar duniyā

chale to rafta rafta rah gayā asbāb raste meñ

ham aise rāh-rau the koī bhī manzil na ho jin kī

safīne aarzū ke ho ga.e ġharqāb raste meñ

kisi banjar taKHayyul par kisi be-ab rishte mein

zara Thahre to patthar ban gae ahbab raste mein

sarabon ki gali hai ya tere ganw ka kona hai

laga hai KHak par shishe ka ek talab raste mein

abhi kuchh der pahle panw ke niche na the baadal

abhi phaila gai hain teri aankhen KHwab raste mein

meri tayyariyan mere safar mein ho gain hail

kabhi tawiz bazu par kabhi mehrab raste mein

samundar apne markaz mein khincha hai meri aankhon ka

so ab mumkin nahin hai rokna sailab raste mein

main kafi der pahle jis ko ghar mein chhoD aaya tha

khaDa hai munh phulae ab wahi mahtab raste mein

safar aasan nahin hota kamar pe lad kar duniya

chale to rafta rafta rah gaya asbab raste mein

hum aise rah-rau the koi bhi manzil na ho jin ki

safine aarzu ke ho gae gharqab raste mein