kisi gali kisi chhat par zarur niklega

kisī galī kisī chhat par zarūr niklegā

vo chāñd abr se bāhar zarūr niklegā

ye hukmarāni-e-shab der tak nahīñ hogī

kahīñ se mehr-e-munavvar zarūr niklegā

isī girānī-e-shab kī dabīz chādar se

numūd-e-sub.h kā manzar zarūr niklegā

ḳhud apne aap se laḌnī paḌegī jang hameñ

diloñ se ḳhauf kā lashkar zarūr niklegā

ye shahr-e-shīshagarāñ hai to phir yahīñ pe kahīñ

kisī kī jeb se patthar zarūr niklegā

ġhubār-e-dil-zadagāñ ko bahut haqīr na jaan

ye ek hashr uThā kar zarūr niklegā

use ḳhayāl-e-dil-e-dostāñ agar aayā

to āñsuoñ kā samundar zarūr niklegā

kuredte raho vīrān bastiyoñ kī ye raakh

yahīñ kahīñ pe mirā ghar zarūr niklegā

ḳhamoshiyoñ kī isī sar-zamīn se 'ashfāq'

koī na koī suḳhanvar zarūr niklegā

kisi gali kisi chhat par zarur niklega

wo chand abr se bahar zarur niklega

ye hukmarani-e-shab der tak nahin hogi

kahin se mehr-e-munawwar zarur niklega

isi girani-e-shab ki dabiz chadar se

numud-e-subh ka manzar zarur niklega

KHud apne aap se laDni paDegi jang hamein

dilon se KHauf ka lashkar zarur niklega

ye shahr-e-shishagaran hai to phir yahin pe kahin

kisi ki jeb se patthar zarur niklega

ghubar-e-dil-zadagan ko bahut haqir na jaan

ye ek hashr uTha kar zarur niklega

use KHayal-e-dil-e-dostan agar aaya

to aansuon ka samundar zarur niklega

kuredte raho viran bastiyon ki ye rakh

yahin kahin pe mera ghar zarur niklega

KHamoshiyon ki isi sar-zamin se 'ashfaq'

koi na koi suKHanwar zarur niklega