kisi jahan mein hun tera KHayal rakhti hun

kisī jahāñ meñ huuñ terā ḳhayāl rakhtī huuñ

tire ḳhayāl se dil ko ujaal rakhtī huuñ

nigah kī tishnagī aisī ki sair hotī nahīñ

maiñ tishna āñkhoñ meñ terā jamāl rakhtī huuñ

maiñ tere fiil ko mārūñgī apne payāde se

bisāt-e-vaqt pe ḳhud apnī chaal rakhtī huuñ

ye mere sher jo har ek kī zabāñ par haiñ

maiñ apne sheroñ meñ terā kamāl rakhtī huuñ

maiñ terī āñkhoñ se apnā vajūd dekhtī huuñ

tire laboñ kī hañsī bhī sambhāl rakhtī huuñ

mahāz-e-ishq pe qurbat kī jañg laḌte hue

maiñ furqatoñ ke mumāsil visāl rakhtī huuñ

ġhanīm jaan se 'nig.hat' muqāble ke liye

maiñ apne sāmne terī misāl rakhtī huuñ

kisi jahan mein hun tera KHayal rakhti hun

tere KHayal se dil ko ujal rakhti hun

nigah ki tishnagi aisi ki sair hoti nahin

main tishna aankhon mein tera jamal rakhti hun

main tere fil ko marungi apne payaade se

bisat-e-waqt pe KHud apni chaal rakhti hun

ye mere sher jo har ek ki zaban par hain

main apne sheron mein tera kamal rakhti hun

main teri aankhon se apna wajud dekhti hun

tere labon ki hansi bhi sambhaal rakhti hun

mahaz-e-ishq pe qurbat ki jang laDte hue

main furqaton ke mumasil visal rakhti hun

ghanim jaan se 'nighat' muqable ke liye

main apne samne teri misal rakhti hun