kisi ka dhyan mah-e-nim-mah mein aaya

kisī kā dhyān mah-e-nīm-māh meñ aayā

safar kī raat thī aur ḳhvāb raah meñ aayā

tulū-e-sā.at-e-shab-ḳhūñ hai aur merā dil

kisī sitāra-e-bad kī nigāh meñ aayā

mah o sitāra se dil kī taraf chalā vo javāñ

adū kī qaid se apnī sipāh meñ aayā

jihād-e-ġham meñ koī sust zarb merī tarah

giraft-e-maisara-e-ashk-o-āh meñ aayā

sitāre Duub ga.e aur vo sitāra-gar

thakan se chuur zamīñ kī panāh meñ aayā

charāġh hai mirī rātoñ kā ek ḳhvāb-e-visāl

jo koī pal tirī chashm-e-siyāh meñ aayā

dukhī diloñ kī salāmī qubūl karte hue

nazar jhukā.e koī ḳhānqāh meñ aayā

kisi ka dhyan mah-e-nim-mah mein aaya

safar ki raat thi aur KHwab rah mein aaya

tulu-e-saat-e-shab-KHun hai aur mera dil

kisi sitara-e-bad ki nigah mein aaya

mah o sitara se dil ki taraf chala wo jawan

adu ki qaid se apni sipah mein aaya

jihad-e-gham mein koi sust zarb meri tarah

giraft-e-maisara-e-ashk-o-ah mein aaya

sitare Dub gae aur wo sitara-gar

thakan se chur zamin ki panah mein aaya

charagh hai meri raaton ka ek KHwab-e-visal

jo koi pal teri chashm-e-siyah mein aaya

dukhi dilon ki salami qubul karte hue

nazar jhukae koi KHanqah mein aaya