kisi ke ek ishaare mein kis ko kya na mila

kisī ke ek ishāre meñ kis ko kyā na milā

bashar ko ziist milī maut ko bahāna milā

mazāq-e-talḳh-pasandī na pūchh is dil kā

baġhair marg jise ziist kā mazā na milā

dabī zabāñ se mirā haal chārasāz na kah

bas ab tū zahr hī de zahr meñ davā na milā

ḳhudā kī den nahīñ zarf-e-ḳhalq par mauqūf

ye dil bhī kyā hai jise dard kā ḳhazāna milā

duā gadā-e-asar hai gadā pe takiya na kar

ki e'timād-e-asar kyā milā milā na milā

zuhūr-e-jalva ko hai ek zindagī darkār

koī ajal kī tarah der-āshnā na milā

talāsh-e-ḳhizr meñ huuñ rū-shanās-e-ḳhizr nahīñ

mujhe ye dil se gila hai ki rahnumā na milā

nishān-e-mehr hai har zarra zarf-e-mehr nahīñ

ḳhudā kahāñ na milā aur kahīñ ḳhudā na milā

mirī hayāt hai mahrūm-e-muddā-e-hayāt

vo rahguzar huuñ jise koī naqsh-e-pā na milā

vo nā-murād-e-ajal bazm-e-yās meñ bhī nahīñ

yahāñ bhī 'fānī'-e-āvāra kā patā na milā

kisi ke ek ishaare mein kis ko kya na mila

bashar ko zist mili maut ko bahana mila

mazaq-e-talKH-pasandi na puchh is dil ka

baghair marg jise zist ka maza na mila

dabi zaban se mera haal chaarasaz na kah

bas ab tu zahr hi de zahr mein dawa na mila

KHuda ki den nahin zarf-e-KHalq par mauquf

ye dil bhi kya hai jise dard ka KHazana mila

dua gada-e-asar hai gada pe takiya na kar

ki e'timad-e-asar kya mila mila na mila

zuhur-e-jalwa ko hai ek zindagi darkar

koi ajal ki tarah der-ashna na mila

talash-e-KHizr mein hun ru-shanas-e-KHizr nahin

mujhe ye dil se gila hai ki rahnuma na mila

nishan-e-mehr hai har zarra zarf-e-mehr nahin

KHuda kahan na mila aur kahin KHuda na mila

meri hayat hai mahrum-e-mudda-e-hayat

wo rahguzar hun jise koi naqsh-e-pa na mila

wo na-murad-e-ajal bazm-e-yas mein bhi nahin

yahan bhi 'fani'-e-awara ka pata na mila