kisi ke faiz-e-qurb se hayat ab sanwar gai

kisī ke faiz-e-qurb se hayāt ab sañvar ga.ī

nafas nafas mahak uThā nazar nazar nikhar ga.ī

nigāh-e-nāz jab uThī ajiib kaam kar ga.ī

jo rañg-e-ruḳh uḌā diyā to dil meñ rañg bhar ga.ī

mirī samajh meñ aa gayā har ek rāz-e-zindagī

jo dil pe choT paḌ ga.ī to duur tak nazar ga.ī

ab aas TuuT kar mujhe sukūñ nasīb ho gayā

jo shām-e-intizār thī vo shaam to guzar ga.ī

kalī dil-e-tabāh kī khilī na 'chishti'-e-hazīñ

ḳhizāñ bhī aa ke jā chukī bahār bhī guzar ga.ī

kisi ke faiz-e-qurb se hayat ab sanwar gai

nafas nafas mahak uTha nazar nazar nikhar gai

nigah-e-naz jab uThi ajib kaam kar gai

jo rang-e-ruKH uDa diya to dil mein rang bhar gai

meri samajh mein aa gaya har ek raaz-e-zindagi

jo dil pe choT paD gai to dur tak nazar gai

ab aas TuT kar mujhe sukun nasib ho gaya

jo sham-e-intizar thi wo sham to guzar gai

kali dil-e-tabah ki khili na 'chishti'-e-hazin

KHizan bhi aa ke ja chuki bahaar bhi guzar gai