kisi ke ishq mein ye haal-e-zar rahta hai

kisī ke ishq meñ ye hāl-e-zār rahtā hai

sukūn pā ke bhī dil be-qarār rahtā hai

vo mai-kade meñ bahut bā-vaqār rahtā hai

jo be-ḳhudī meñ bhī kuchh hoshyār rahtā hai

mujhe bahār-e-gulistāñ pe naaz ho kyūñkar

mirī nazar meñ ma.āl-e-bahār rahtā hai

dil-e-hazīñ ġham-e-daurāñ se āshnā na sahī

tumhāre ġham se magar ham-kanār rahtā hai

koī to baat hai aisī ki un ke va.adoñ par

ḳhulūs-e-dil se mujhe e'tibār rahtā hai

ba-faiz-e-josh-e-junūñ ab maiñ us maqām pe huuñ

jahāñ junūñ hī mirā rāz-dār rahtā hai

ye jāntā huuñ na aa.e haiñ vo na ā.eñge

'nasīm' phir bhī mujhe intizār rahtā hai

kisi ke ishq mein ye haal-e-zar rahta hai

sukun pa ke bhi dil be-qarar rahta hai

wo mai-kade mein bahut ba-waqar rahta hai

jo be-KHudi mein bhi kuchh hoshyar rahta hai

mujhe bahaar-e-gulistan pe naz ho kyunkar

meri nazar mein maal-e-bahaar rahta hai

dil-e-hazin gham-e-dauran se aashna na sahi

tumhaare gham se magar ham-kanar rahta hai

koi to baat hai aisi ki un ke wadon par

KHulus-e-dil se mujhe e'tibar rahta hai

ba-faiz-e-josh-e-junun ab main us maqam pe hun

jahan junun hi mera raaz-dar rahta hai

ye jaanta hun na aae hain wo na aaenge

'nasim' phir bhi mujhe intizar rahta hai