kisi ke naqsh-e-qadam ka nishan nahin milta

kisī ke naqsh-e-qadam kā nishāñ nahīñ miltā

vo rahguzar huuñ jise kārvāñ nahīñ miltā

qadam qadam pe tirī raah meñ falak haa.il

mujhe talāsh se bhī āsmāñ nahīñ miltā

unheñ tarīqa-e-lutf-o-karam nahīñ mālūm

hameñ salīqa-e-āh-o-fuġhāñ nahīñ miltā

urūs-e-dahr ko ġhāza bhī chāhiye lekin

ġhubār-e-jāda-e-amn-o-amāñ nahīñ miltā

dhaḌak rahā hai har ahl-e-vafā ke siine meñ

hamārā dard bharā dil kahāñ nahīñ miltā

sabhī ko da.ava-e-mahr-o-vafā hai duniyā meñ

jo mehrbāñ na ho vo mehrbāñ nahīñ miltā

ġham-e-hayāt ke pur-haul qahqahoñ ke sivā

kahīñ se apnā javāb-e-fuġhāñ nahīñ miltā

dil-e-shikasta ko le jā.iye kahāñ 'bāsit'

dimāġh-e-naḳhvat-e-shīsha-garāñ nahīñ miltā

kisi ke naqsh-e-qadam ka nishan nahin milta

wo rahguzar hun jise karwan nahin milta

qadam qadam pe teri rah mein falak hail

mujhe talash se bhi aasman nahin milta

unhen tariqa-e-lutf-o-karam nahin malum

hamein saliqa-e-ah-o-fughan nahin milta

urus-e-dahr ko ghaza bhi chahiye lekin

ghubar-e-jada-e-amn-o-aman nahin milta

dhaDak raha hai har ahl-e-wafa ke sine mein

hamara dard bhara dil kahan nahin milta

sabhi ko dawa-e-mahr-o-wafa hai duniya mein

jo mehrban na ho wo mehrban nahin milta

gham-e-hayat ke pur-haul qahqahon ke siwa

kahin se apna jawab-e-fughan nahin milta

dil-e-shikasta ko le jaiye kahan 'basit'

dimagh-e-naKHwat-e-shisha-garan nahin milta