kisi ki aankh se sapne chura kar kuchh nahin milta

kisī kī aañkh se sapne churā kar kuchh nahīñ miltā

muñDeroñ se charāġhoñ ko bujhā kar kuchh nahīñ miltā

hamārī soch kī parvāz ko roke nahīñ koī

na.e aflāk pe pahre biThā kar kuchh nahīñ miltā

koī ik aadh sapnā ho to phir achchhā bhī lagtā hai

hazāroñ ḳhvāb āñkhoñ meñ sajā kar kuchh nahīñ miltā

sukūñ un ko nahīñ miltā kabhī pardes jā kar bhī

jinheñ apne vatan se dil lagā kar kuchh nahiñ miltā

use kahnā ki palkoñ par na Tāñke ḳhvāb kī jhālar

samundar ke kināre ghar banā kar kuchh nahīñ miltā

ye achchhā hai ki aapas ke bharam nā TūTne paa.eñ

kabhī bhī dostoñ ko aazmā kar kuchh nahīñ miltā

na jaane kaun se jazbe kī yuuñ taskīn kartā huuñ

ba-zāhir to tumhāre ḳhat jalā kar kuchh nahīñ miltā

faqat tum se hī kartā huuñ maiñ saarī raaz kī bāteñ

har ik ko dāstān-e-dil sunā kar kuchh nahīñ miltā

amal kī sūkhtī rag meñ zarā sā ḳhuun shāmil kar

mire hamdam faqat bāteñ banā kar kuchh nahīñ miltā

ise meñ pyaar kartā huuñ to mujh ko chain aatā hai

vo kahtā hai use mujh ko satā kar kuchh nahīñ miltā

mujhe aksar sitāroñ se yahī āvāz aatī hai

kisī ke hijr meñ nīñdeñ gañvā kar kuchh nahīñ miltā

jigar ho jā.egā chhalnī ye āñkheñ ḳhuun ro.eñgī

'vasī' be-faiz logoñ se nibhā kar kuchh nahīñ miltā

kisi ki aankh se sapne chura kar kuchh nahin milta

munDeron se charaghon ko bujha kar kuchh nahin milta

hamari soch ki parwaz ko roke nahin koi

nae aflak pe pahre biTha kar kuchh nahin milta

koi ek aadh sapna ho to phir achchha bhi lagta hai

hazaron KHwab aankhon mein saja kar kuchh nahin milta

sukun un ko nahin milta kabhi pardes ja kar bhi

jinhen apne watan se dil laga kar kuchh nahin milta

use kahna ki palkon par na Tanke KHwab ki jhaalar

samundar ke kinare ghar bana kar kuchh nahin milta

ye achchha hai ki aapas ke bharam na TuTne paen

kabhi bhi doston ko aazma kar kuchh nahin milta

na jaane kaun se jazbe ki yun taskin karta hun

ba-zahir to tumhaare KHat jala kar kuchh nahin milta

faqat tum se hi karta hun main sari raaz ki baaten

har ek ko dastan-e-dil suna kar kuchh nahin milta

amal ki sukhti rag mein zara sa KHun shamil kar

mere hamdam faqat baaten bana kar kuchh nahin milta

ise mein pyar karta hun to mujh ko chain aata hai

wo kahta hai use mujh ko sata kar kuchh nahin milta

mujhe aksar sitaron se yahi aawaz aati hai

kisi ke hijr mein ninden ganwa kar kuchh nahin milta

jigar ho jaega chhalni ye aankhen KHun roengi

'wasi' be-faiz logon se nibha kar kuchh nahin milta