kisi ki chashm-e-sada yaad aai

kisī kī chashm-e-sāda yaad aa.ī

harīf-e-jām-o-bāda yaad aa.ī

huī har āfiyat madfūn jis meñ

vo dīvār-e-fatāda yaad aa.ī

savād-e-dair-o-ka.aba meñ pahuñch kar

tirī mahfil ziyāda yaad aa.ī

kisī ko be-tamannā bhuul baiThe

kisī kī be-irāda yaad aa.ī

zamāne se huā dil tang jab bhī

vo āġhosh-e-kushāda yaad aa.ī

kabhī tujh ko bhī ai sohbat farāmosh

bahār-e-jān-dāda yaad aa.ī

jo manzil chhoḌ kar aa.e haiñ 'shaukat'

vahī jāda-ba-jāda yaad aa.ī

kisi ki chashm-e-sada yaad aai

harif-e-jam-o-baada yaad aai

hui har aafiyat madfun jis mein

wo diwar-e-fatada yaad aai

sawad-e-dair-o-kaba mein pahunch kar

teri mahfil ziyaada yaad aai

kisi ko be-tamanna bhul baiThe

kisi ki be-irada yaad aai

zamane se hua dil tang jab bhi

wo aaghosh-e-kushada yaad aai

kabhi tujh ko bhi ai sohbat faramosh

bahaar-e-jaan-dada yaad aai

jo manzil chhoD kar aae hain 'shaukat'

wahi jada-ba-jada yaad aai