kisi ki kisi ko mohabbat nahin hai

kisī kī kisī ko mohabbat nahīñ hai

abhī is kī duniyā ko lazzat nahīñ hai

agar tum ko milne kī fursat nahīñ hai

mujhe bhī ziyāda zarūrat nahīñ hai

bahut ḳhushnumā hai gulistān-e-ālam

magar sair karne kī fursat nahīñ hai

bahut se gharoñ meñ ḳhazāne haiñ madfūñ

nahīñ hai to ganj-e-qanā.at nahīñ hai

kahāñ tak na behosh-o-be-ḳhud karegī

mai-e-vasl hai koī sharbat nahīñ hai

ḳhayālāt meñ apne huuñ ġharq vaa.iz

mujhe kahne sunñe kī fursat nahīñ hai

dikhāte nahīñ sharm se rū-e-raushan

koī kāmyābī kī sūrat nahīñ hai

tazalzul meñ kis vāste hai zamāna

shab-e-hijr hai ye qayāmat nahīñ hai

kahāñ ai parī tū kahāñ hūr-e-jannat

tirī us kī aapas meñ nisbat nahīñ hai

mirī qumriyoñ ke sivā kaun insāñ

ye shamshād hai is kī qāmat nahīñ hai

vo uTThe to lākhoñ hī fitne uTheñge

vo qāmat bhī kam-az-qayāmat nahīñ hai

na kyuuñ dil lage yaañ vo hai aur ḳhalvat

ye huurā nahīñ hai ye jannat nahīñ hai

jafā.eñ na kiije na kiije na kiije

tahammul kī ab mujh ko tāqat nahīñ hai

talātum meñ masrūf hai qatra qatra

koī shai yahāñ be-haqīqat nahīñ hai

jahāñ tak bane tum se be-dād kar lo

agar aane vaalī qayāmat nahīñ hai

laraztā hai kyuuñ Dar se ai jism-e-lāġhar

ye dhaḌkā hai dil kā qayāmat nahīñ hai

hasīnoñ kī chāhat hasīnoñ kī ulfat

musībat bhī hai aur musībat nahīñ hai

tumheñ āshiq aur mujh ko ma.ashūq lākhoñ

yahāñ ādamiyyoñ kī qillat nahīñ hai

sambhal kar zarā nāz-o-aġhmāz kiije

hasīnoñ kī duniyā meñ qillat nahīñ hai

zamāne meñ hone ko sab kuchh hai 'parvīñ'

hameñ kyā umīd-e-shafā.at nahīñ hai

kisi ki kisi ko mohabbat nahin hai

abhi is ki duniya ko lazzat nahin hai

agar tum ko milne ki fursat nahin hai

mujhe bhi ziyaada zarurat nahin hai

bahut KHushnuma hai gulistan-e-alam

magar sair karne ki fursat nahin hai

bahut se gharon mein KHazane hain madfun

nahin hai to ganj-e-qanaat nahin hai

kahan tak na behosh-o-be-KHud karegi

mai-e-wasl hai koi sharbat nahin hai

KHayalat mein apne hun gharq waiz

mujhe kahne sunne ki fursat nahin hai

dikhate nahin sharm se ru-e-raushan

koi kaamyabi ki surat nahin hai

tazalzul mein kis waste hai zamana

shab-e-hijr hai ye qayamat nahin hai

kahan ai pari tu kahan hur-e-jannat

teri us ki aapas mein nisbat nahin hai

meri qumriyon ke siwa kaun insan

ye shamshad hai is ki qamat nahin hai

wo uTThe to lakhon hi fitne uThenge

wo qamat bhi kam-az-qayamat nahin hai

na kyun dil lage yan wo hai aur KHalwat

ye hura nahin hai ye jannat nahin hai

jafaen na kije na kije na kije

tahammul ki ab mujh ko taqat nahin hai

talatum mein masruf hai qatra qatra

koi shai yahan be-haqiqat nahin hai

jahan tak bane tum se be-dad kar lo

agar aane wali qayamat nahin hai

larazta hai kyun Dar se ai jism-e-laghar

ye dhaDka hai dil ka qayamat nahin hai

hasinon ki chahat hasinon ki ulfat

musibat bhi hai aur musibat nahin hai

tumhein aashiq aur mujh ko mashuq lakhon

yahan aadamiyyon ki qillat nahin hai

sambhal kar zara naz-o-aghmaz kije

hasinon ki duniya mein qillat nahin hai

zamane mein hone ko sab kuchh hai 'parwin'

hamein kya umid-e-shafaat nahin hai