kisi kisi pe KHuda mehrban ziyaada hai

kisī kisī pe ḳhudā mehrbāñ ziyāda hai

vo jāntā hai zarūrat kahāñ ziyāda hai

zabāñ se pūchhiye mat haath dekhiye rakh kar

badan meñ dard kahāñ kam kahāñ ziyāda hai

charāġh-e-umr kī lau ne dilā diyā ehsās

ki is meñ raushnī kam hai dhuāñ ziyāda hai

mirī suno to kudūrat kā khel mat khelo

ki is meñ suud bahut kam ziyāñ ziyāda hai

na kiije baat farishtoñ se talḳh lahje meñ

galī meñ shor jo vaqt-e-azāñ ziyāda hai

muqāble kā añdheroñ se hausla hai to phir

zarā sā nuur bhī jugnū miyāñ ziyāda hai

azal se donoñ meñ rishta aTuuT hai to 'amīn'

hayāt maut se kyoñ bad-gumāñ ziyāda hai

kisi kisi pe KHuda mehrban ziyaada hai

wo jaanta hai zarurat kahan ziyaada hai

zaban se puchhiye mat hath dekhiye rakh kar

badan mein dard kahan kam kahan ziyaada hai

charagh-e-umr ki lau ne dila diya ehsas

ki is mein raushni kam hai dhuan ziyaada hai

meri suno to kudurat ka khel mat khelo

ki is mein sud bahut kam ziyan ziyaada hai

na kije baat farishton se talKH lahje mein

gali mein shor jo waqt-e-azan ziyaada hai

muqable ka andheron se hausla hai to phir

zara sa nur bhi jugnu miyan ziyaada hai

azal se donon mein rishta aTuT hai to 'amin'

hayat maut se kyon bad-guman ziyaada hai