kisi ko dekh kar be-KHud dil-e-kaam ho jaana

kisī ko dekh kar be-ḳhud dil-e-kām ho jaanā

usī ko log kahte haiñ ḳhayāl-e-ḳhām ho jaanā

mohabbat se jo pesh aa.e koī ho dost yā dushman

hameñ to har kisī kā banda-e-be-dām ho jaanā

ḳhudā jaane ki kyā hotā ma.aal apnī mohabbat kā

bahut achchhā huā āġhāz meñ anjām ho jaanā

miTānā ho agar dhabbā riyā-kārī kā ai zāhid

kisī kī bazm meñ ik din sharīk-e-jām ho jaanā

jahāñ dekho vahāñ kuchh zikr hai apnī mohabbat kā

burā hai aadmī ke vāste badnām ho jaanā

karegā raḳhna paidā koī din darbāñ kā hañgāma

qayāmat hai tire dar par hujūm-e-ām ho jaanā

'hafīz' aise musalmāñ kā bhī koī dīn-o-maz.hab hai

butoñ kī dostī meñ tārik-e-islām ho jaanā

kisi ko dekh kar be-KHud dil-e-kaam ho jaana

usi ko log kahte hain KHayal-e-KHam ho jaana

mohabbat se jo pesh aae koi ho dost ya dushman

hamein to har kisi ka banda-e-be-dam ho jaana

KHuda jaane ki kya hota maal apni mohabbat ka

bahut achchha hua aaghaz mein anjam ho jaana

miTana ho agar dhabba riya-kari ka ai zahid

kisi ki bazm mein ek din sharik-e-jam ho jaana

jahan dekho wahan kuchh zikr hai apni mohabbat ka

bura hai aadmi ke waste badnam ho jaana

karega raKHna paida koi din darban ka hangama

qayamat hai tere dar par hujum-e-am ho jaana

'hafiz' aise musalman ka bhi koi din-o-mazhab hai

buton ki dosti mein tarik-e-islam ho jaana