kisi ko fikr jo di hai to fan nahin deta

kisī ko fikr jo dī hai to fan nahīñ detā

vo sab ko ek sā tarz-e-suḳhan nahīñ detā

maiñ apnī ḳhāna-nashīnī meñ har tarah ḳhush huuñ

na de koī jo mujhe anjuman nahīñ detā

use ḳhabar hai ki tarz-e-ḳhitāb jāntā huuñ

isī liye mujhe izn-e-suḳhan nahīñ detā

baḌe nasīb se miltī hai aisī jāma-darī

ḳhudā har ek ko dīvāna-pan nahīñ detā

bujhāo tum bhī ise phūñk maar ke 'qaisar'

koī charāġh kī lau meñ dahan nahīñ detā

kisi ko fikr jo di hai to fan nahin deta

wo sab ko ek sa tarz-e-suKHan nahin deta

main apni KHana-nashini mein har tarah KHush hun

na de koi jo mujhe anjuman nahin deta

use KHabar hai ki tarz-e-KHitab jaanta hun

isi liye mujhe izn-e-suKHan nahin deta

baDe nasib se milti hai aisi jama-dari

KHuda har ek ko diwana-pan nahin deta

bujhao tum bhi ise phunk mar ke 'qaisar'

koi charagh ki lau mein dahan nahin deta