kisi la-ilaj rajai ne ye KHabar chaman mein uDai hai

kisī lā-ilāj rajā.ī ne ye ḳhabar chaman meñ uḌaa.ī hai

koī patta jab na ho peḌ par to samajh lo fasl-e-gul aa.ī hai

koī ishtirāk zarūr hai vo ho rang kā ki umang kā

mirā dil bhī to gul-e-surḳh hai tirā haath bhī to hinā.ī hai

vo kashish kuchh aur hī chiiz hai jise husn kahte haiñ ahl-e-dil

na jamāl-e-āriz-o-chashm-o-lab na kamāl-e-chust-qabā.ī hai

safar-e-hayāt ke moḌ par mujhe tū milā ki ḳhudā milā

yahī merā ka.aba-e-justujū yahī merī hadd-e-rasā.ī hai

maiñ jhukūñ to chāñd jhukā rahe maiñ rukūñ to vaqt rukā rahe

maiñ tirī vafā kā jab ahl huuñ mire bas meñ saarī ḳhudā.ī hai

maiñ 'nadīm' qarya-e-sīm-o-zar se bhī sar-kashīda guzar gayā

jo mirī anā kā ġhurūr hai mirī umr bhar kī kamā.ī hai

kisi la-ilaj rajai ne ye KHabar chaman mein uDai hai

koi patta jab na ho peD par to samajh lo fasl-e-gul aai hai

koi ishtirak zarur hai wo ho rang ka ki umang ka

mera dil bhi to gul-e-surKH hai tera hath bhi to hinai hai

wo kashish kuchh aur hi chiz hai jise husn kahte hain ahl-e-dil

na jamal-e-ariz-o-chashm-o-lab na kamal-e-chust-qabai hai

safar-e-hayat ke moD par mujhe tu mila ki KHuda mila

yahi mera kaba-e-justuju yahi meri hadd-e-rasai hai

main jhukun to chand jhuka rahe main rukun to waqt ruka rahe

main teri wafa ka jab ahl hun mere bas mein sari KHudai hai

main 'nadim' qarya-e-sim-o-zar se bhi sar-kashida guzar gaya

jo meri ana ka ghurur hai meri umr bhar ki kamai hai