kisi maqam pe hum ko bhi rokta koi

kisī maqām pe ham ko bhī roktā koī

magar uḌaa.e liye jaatī hai havā koī

tamām-umr na mujh ko milā vajūd mirā

tamām-umr mujhe sochtā rahā koī

mujhe sameT lo yā phir uḌā ke le jaao

ye kah ke rāh-e-talab meñ bikhar gayā koī

yūñhī sadā.eñ na do ḳhāmushī ke sahrā meñ

havā chalegī to aa jā.egī sadā koī

kisī ko apnī nigāhoñ pe e.atibār na thā

hameñ hamārī tarah kaise dekhtā koī

hazār sañg haiñ rāhoñ meñ ab bhī so.e hue

ye aur baat hai ham ko jagā gayā koī

badan ke dasht ko ham jis se paar kar lete

kahīñ milā na hameñ aisā rāsta koī

maiñ band kamre meñ ḳhāmosh rah to saktā huuñ

mire badan meñ agar ghuT ke mar gayā koī

kisi maqam pe hum ko bhi rokta koi

magar uDae liye jati hai hawa koi

tamam-umr na mujh ko mila wajud mera

tamam-umr mujhe sochta raha koi

mujhe sameT lo ya phir uDa ke le jao

ye kah ke rah-e-talab mein bikhar gaya koi

yunhi sadaen na do KHamushi ke sahra mein

hawa chalegi to aa jaegi sada koi

kisi ko apni nigahon pe eatibar na tha

hamein hamari tarah kaise dekhta koi

hazar sang hain rahon mein ab bhi soe hue

ye aur baat hai hum ko jaga gaya koi

badan ke dasht ko hum jis se par kar lete

kahin mila na hamein aisa rasta koi

main band kamre mein KHamosh rah to sakta hun

mere badan mein agar ghuT ke mar gaya koi