kisi mausam ki wo baaten jo teri yaad karta hun

kisī mausam kī vo bāteñ jo terī yaad kartā huuñ

unhīñ bātoñ ko phir phir kah dil apnā shaad kartā huuñ

nahīñ ma.alūm mujh par bhī ye ahvāl apnī zaarī kā

ki maiñ misl-e-jaras kis ke liye fariyād kartā huuñ

ye dil kuchh aaphī ho jaatā hai band aur aaphī khultā hai

na maiñ qaid is ko kartā huuñ na maiñ āzād kartā huuñ

jigar jal kar huā hai ḳhaak aur tis par maiñ aahoñ se

jo kuchh baaqī rahe hai gard so barbād kartā huuñ

ġhubār-e-dil ko āb-e-teġh se us ke milā kar maiñ

na.e sar se imārat dil kī phir buniyād kartā huuñ

mire ābād dil ko kar ḳharāb us ne kahā hañs hañs

ki maiñ is mulk kā naam ab ḳharāb-ābād kartā huuñ

kabhī tere bhī dil meñ ye guzartī hai ki maiñ nāhaq

bhalā dil par 'hasan' ke itnī kyuuñ be-dād kartā huuñ

kisi mausam ki wo baaten jo teri yaad karta hun

unhin baaton ko phir phir kah dil apna shad karta hun

nahin malum mujh par bhi ye ahwal apni zari ka

ki main misl-e-jaras kis ke liye fariyaad karta hun

ye dil kuchh aaphi ho jata hai band aur aaphi khulta hai

na main qaid is ko karta hun na main aazad karta hun

jigar jal kar hua hai KHak aur tis par main aahon se

jo kuchh baqi rahe hai gard so barbaad karta hun

ghubar-e-dil ko aab-e-tegh se us ke mila kar main

nae sar se imarat dil ki phir buniyaad karta hun

mere aabaad dil ko kar KHarab us ne kaha hans hans

ki main is mulk ka nam ab KHarab-abaad karta hun

kabhi tere bhi dil mein ye guzarti hai ki main nahaq

bhala dil par 'hasan' ke itni kyun be-dad karta hun