kisi rut mein jab muskuraata hai tu

kisī rut meñ jab muskurātā hai tū

numū pattharoñ meñ jagātā hai tū

tirā sho.ala-e-nutq rūh-e-ravāñ

ufuq-tā-ufuq phail jaatā hai tū

kabhī kholtā hai samundar ke raaz

kabhī ek qatra chhupātā hai tū

kabhī ġharq kar de safīne hazār

kabhī ek kashtī tarātā hai tū

kabhī phūñk de vādī-e-gul tamām

kabhī aag meñ gul khilātā hai tū

kabhī sharh-e-lā-taqnatū ke liye

sarāboñ meñ dariyā bahātā hai tū

gavārā nahīñ tujh ko vīrāniyāñ

ḳharāboñ ko phir se basātā hai tū

siyah saḳht maujoñ ke aaseb meñ

jazīre dhanak rañg ugātā hai tū

tire izn se andhī āñkhoñ meñ nuur

kabhī ḳhaak meñ ram jagātā hai tū

kiran bhej kar ek zulmāt kī

shahanshāhoñ ko zalzalātā hai tū

ujāloñ meñ haiñ terī rangīniyāñ

añdheroñ meñ sham.eñ jalātā hai tū

kisi rut mein jab muskuraata hai tu

numu pattharon mein jagata hai tu

tera shoala-e-nutq ruh-e-rawan

ufuq-ta-ufuq phail jata hai tu

kabhi kholta hai samundar ke raaz

kabhi ek qatra chhupata hai tu

kabhi gharq kar de safine hazar

kabhi ek kashti taraata hai tu

kabhi phunk de wadi-e-gul tamam

kabhi aag mein gul khilata hai tu

kabhi sharh-e-la-taqnatu ke liye

sarabon mein dariya bahata hai tu

gawara nahin tujh ko viraniyan

KHarabon ko phir se basata hai tu

siyah saKHt maujon ke aaseb mein

jazire dhanak rang ugata hai tu

tere izn se andhi aankhon mein nur

kabhi KHak mein ram jagata hai tu

kiran bhej kar ek zulmat ki

shahanshahon ko zalzalata hai tu

ujalon mein hain teri ranginiyan

andheron mein shamen jalata hai tu