kisi se jab na uTTha to uTTha bar-e-garan humse

kisī se jab na uTThā to uTThā bār-e-garāñ ham se

milā sakte nahīñ ab aañkh sātoñ āsmāñ ham se

hañsā kar ek do din 'umr bhar āḳhir rulātā hai

'ajab aTkheliyāñ kartā hai daur-e-āsmāñ ham se

hamārā jab ye honā bhī na hone ke barābar hai

tū āḳhir kyoñ ḳhafā baiThī hai marg-e-nā-gahāñ ham se

abhī pesh-e-nazar ta.amīr-e-fardā kī haiñ tajvīzeñ

hazāroñ gaam baazī le ga.ī 'umr-e-ravāñ ham se

afākallāh ai daur-e-falak ham muntazir hī the

ki kab āñkheñ churāte haiñ hamāre mehrbāñ ham se

hai jab dushvār ik lahore hī ko chhoḌnā 'sā.ib'

to phir is haal meñ chhūTegā kyā hindostāñ ham se

kisi se jab na uTTha to uTTha bar-e-garan hum se

mila sakte nahin ab aankh saton aasman hum se

hansa kar ek do din 'umr bhar aaKHir rulata hai

'ajab aTkheliyan karta hai daur-e-asman hum se

hamara jab ye hona bhi na hone ke barabar hai

tu aaKHir kyon KHafa baiThi hai marg-e-na-gahan hum se

abhi pesh-e-nazar tamir-e-farda ki hain tajwizen

hazaron gam bazi le gai 'umr-e-rawan hum se

afakallah ai daur-e-falak hum muntazir hi the

ki kab aankhen churaate hain hamare mehrban hum se

hai jab dushwar ek lahore hi ko chhoDna 'saib'

to phir is haal mein chhuTega kya hindostan hum se