kisi tarah din to kaT rahe hain fareb-e-ummid kha raha hun

kisī tarah din to kaT rahe haiñ fareb-e-ummīd khā rahā huuñ

hazār-hā naqsh aarzū ke banā rahā huuñ miTā rahā huuñ

vafā mirī mo'tabar hai kitnī jafā vo kar sakte haiñ kahāñ tak

jo vo mujhe aazmā rahe haiñ to maiñ unheñ aazmā rahā huuñ

kisī kī mahfil kā naġhma-e-nai moharrik-e-nāla o fuġhāñ hai

fasāna-e-aish sun rahā huuñ fasāna-e-ġham sunā rahā huuñ

zamāna bhī mujh se nā-muvāfiq maiñ aap bhī dushman-e-salāmat

ta.ajjub is kā hai bojh kyūñkar maiñ zindagī kā uThā rahā huuñ

na ho mujhe justujū-e-manzil magar hai manzil mirī talab meñ

koī to mujh ko bulā rahā hai kisī taraf ko to jā rahā huuñ

yahī to hai nafā koshishoñ kā ki kaam saare bigaḌ rahe haiñ

yahī to hai fā.eda havas kā ki ashk-e-hasrat bahā rahā huuñ

ḳhudā hī jaane ye sāda-lauhī dikhā.egī kyā natīja 'vahshat'

vo jitnī ulfat ghaTā rahe haiñ usī qadar maiñ baḌhā rahā huuñ

kisi tarah din to kaT rahe hain fareb-e-ummid kha raha hun

hazar-ha naqsh aarzu ke bana raha hun miTa raha hun

wafa meri mo'tabar hai kitni jafa wo kar sakte hain kahan tak

jo wo mujhe aazma rahe hain to main unhen aazma raha hun

kisi ki mahfil ka naghma-e-nai moharrik-e-nala o fughan hai

fasana-e-aish sun raha hun fasana-e-gham suna raha hun

zamana bhi mujh se na-muwafiq main aap bhi dushman-e-salamat

tajjub is ka hai bojh kyunkar main zindagi ka uTha raha hun

na ho mujhe justuju-e-manzil magar hai manzil meri talab mein

koi to mujh ko bula raha hai kisi taraf ko to ja raha hun

yahi to hai nafa koshishon ka ki kaam sare bigaD rahe hain

yahi to hai faeda hawas ka ki ashk-e-hasrat baha raha hun

KHuda hi jaane ye sada-lauhi dikhaegi kya natija 'wahshat'

wo jitni ulfat ghaTa rahe hain usi qadar main baDha raha hun