kitab-e-sabz o dar-e-dastan band kiye

kitāb-e-sabz o dar-e-dāstān band kiye

vo aañkh so ga.ī ḳhvāboñ ko arjumand kiye

guzar gayā hai vo sailāb-e-ātish-e-imroz

baġhair ḳhema o ḳhāshāk ko gazand kiye

bahut musir the ḳhudāyān-e-sābit-o-sayyār

so maiñ ne aa.ina o āsmāñ pasand kiye

isī jazīra-e-jā-e-namāz par 'sarvat'

zamāna ho gayā dast-e-duā buland kiye

kitab-e-sabz o dar-e-dastan band kiye

wo aankh so gai KHwabon ko arjumand kiye

guzar gaya hai wo sailab-e-atish-e-imroz

baghair KHema o KHashak ko gazand kiye

bahut musir the KHudayan-e-sabit-o-sayyar

so main ne aaina o aasman pasand kiye

isi jazira-e-ja-e-namaz par 'sarwat'

zamana ho gaya dast-e-dua buland kiye