kitabon ne go istiaron mein hum ko batae bahut se Thikane tumhaare

kitāboñ ne go isti.āroñ meñ ham ko batā.e bahut se Thikāne tumhāre

magar kuchh vazāhat se apnā patā do samajhte nahīñ ham ye mub.ham ishāre

har ik phuul gulshan meñ ye kah rahā hai har ik jām-e-mai se ye ham sun rahe haiñ

zamāne kī nazroñ meñ ghar hai usī kā jo hañs hañs ke din zindagī ke guzāre

na ahl-e-haram ne madad kī hamārī na ahl-e-kalīsā ne ġham-ḳhvāriyāñ kiiñ

agar tū bhī tarz-e-taġhāful na chhoḌe kahāñ jaa.eñ phir ham musībat ke maare

qadāmat-pasandoñ pe kyuuñ hañs rahe ho ḳhudā kī qadāmat-pasandī to dekho

hazāroñ nahīñ balki lākhoñ baras se vahī kahkashāñ hai vahī chāñd taare

mire ashk-e-ḳhūnīñ kī gul-kāriyoñ se zamāne ko rangīñ qabā.eñ milī haiñ

junūn-e-mohabbat kā ye faiz samjhūñ bayābāñ meñ bhī haiñ chaman ke nazāre

na ġham mujh ko girdāb-e-ranj-o-balā kā na muhtāj huuñ maiñ kisī nāḳhudā kā

safīne ko maujoñ kī zad se bachā kar chalā jā rahā huuñ kināre kināre

tirī ḳhashmagīñ aañkh kī gardishoñ ne zamāne ko zer-o-zabar kar diyā hai

sahāroñ pe koī bharosa kare kyā sahāre to ḳhud DhūñDte haiñ sahāre

usī rū-e-raushan ko ham chāhte haiñ umīdoñ ko tārīk jis ne kiyā hai

usī māh-e-tābāñ ko ham DhūñDte haiñ dikhā.e haiñ din ko hameñ jis ne taare

tire shauq meñ jo chalā jā rahā hai jo raste kī mushkil se ghabrā rahā hai

kabhī apnī manzil pe jā hī rahegā magar shart ye hai ki himmat na haare

sunā hai ki shā'ir ho ai 'josh' tum bhī nazar bāġh-e-jannat pe kyuuñ hai tumhārī

musaddas meñ haalī to ye kah ga.e haiñ jahannam ko bhar deñge shā'ir hamāre

kitabon ne go istiaron mein hum ko batae bahut se Thikane tumhaare

magar kuchh wazahat se apna pata do samajhte nahin hum ye mubham ishaare

har ek phul gulshan mein ye kah raha hai har ek jam-e-mai se ye hum sun rahe hain

zamane ki nazron mein ghar hai usi ka jo hans hans ke din zindagi ke guzare

na ahl-e-haram ne madad ki hamari na ahl-e-kalisa ne gham-KHwariyan kin

agar tu bhi tarz-e-taghaful na chhoDe kahan jaen phir hum musibat ke mare

qadamat-pasandon pe kyun hans rahe ho KHuda ki qadamat-pasandi to dekho

hazaron nahin balki lakhon baras se wahi kahkashan hai wahi chand tare

mere ashk-e-KHunin ki gul-kariyon se zamane ko rangin qabaen mili hain

junun-e-mohabbat ka ye faiz samjhun bayaban mein bhi hain chaman ke nazare

na gham mujh ko girdab-e-ranj-o-bala ka na muhtaj hun main kisi naKHuda ka

safine ko maujon ki zad se bacha kar chala ja raha hun kinare kinare

teri KHashmagin aankh ki gardishon ne zamane ko zer-o-zabar kar diya hai

sahaaron pe koi bharosa kare kya sahaare to KHud DhunDte hain sahaare

usi ru-e-raushan ko hum chahte hain umidon ko tarik jis ne kiya hai

usi mah-e-taban ko hum DhunDte hain dikhae hain din ko hamein jis ne tare

tere shauq mein jo chala ja raha hai jo raste ki mushkil se ghabra raha hai

kabhi apni manzil pe ja hi rahega magar shart ye hai ki himmat na haare

suna hai ki sha'ir ho ai 'josh' tum bhi nazar bagh-e-jannat pe kyun hai tumhaari

musaddas mein haali to ye kah gae hain jahannam ko bhar denge sha'ir hamare