kitna DhunDa use jab ek ghazal aur kahi

kitnā DhūñDā use jab ek ġhazal aur kahī

jab milā hī nahīñ tab ek ġhazal aur kahī

ek ummīd mulāqāt meñ likkhī sar-e-shām

aur phir āḳhir-e-shab ek ġhazal aur kahī

ik ġhazal likkhī to ġham koī purānā jaagā

phir usī ġham ke sabab ek ġhazal aur kahī

us ġhazal meñ kisī be-dard kā naam aatā thā

so pa.e bazm-e-tarab ek ġhazal aur kahī

jānte būjhte ik misra-e-tar kī qīmat

dil-e-bedād-talab ek ġhazal aur kahī

dil kī dhaḌkan ko hī pairāya-e-iz.hār kiyā

sil chuke jab mire lab ek ġhazal aur kahī

daf.atan ḳhud se mulāqāt kā ehsās huā

muddatoñ ba.ad jo ab ek ġhazal aur kahī

vahshat-e-hijr bhī tanhā.ī bhī maiñ bhī 'anjum'

jab ikaTThe hue sab ek ġhazal aur kahī

kitna DhunDa use jab ek ghazal aur kahi

jab mila hi nahin tab ek ghazal aur kahi

ek ummid mulaqat mein likkhi sar-e-sham

aur phir aaKHir-e-shab ek ghazal aur kahi

ek ghazal likkhi to gham koi purana jaga

phir usi gham ke sabab ek ghazal aur kahi

us ghazal mein kisi be-dard ka nam aata tha

so pae bazm-e-tarab ek ghazal aur kahi

jaante bujhte ek misra-e-tar ki qimat

dil-e-bedad-talab ek ghazal aur kahi

dil ki dhaDkan ko hi pairaya-e-izhaar kiya

sil chuke jab mere lab ek ghazal aur kahi

dafatan KHud se mulaqat ka ehsas hua

muddaton baad jo ab ek ghazal aur kahi

wahshat-e-hijr bhi tanhai bhi main bhi 'anjum'

jab ikaTThe hue sab ek ghazal aur kahi