kitna hushiyar hua kitna wo farzana hua

kitnā hushiyār huā kitnā vo farzāna huā

terī mastī-bharī āñkhoñ kā jo dīvāna huā

aah ye ālam-e-ġhurbat ye shab-e-tanhā.ī

ik qayāmat huī dhyān aise meñ terā na huā

ik jahāñ aaj bhī hai us ke tilismoñ meñ asiir

sab kā ho kar bhī jo ayyār kisī kā na huā

tujh ko apnāne kā yaarā thā na khone hī kā zarf

dil-e-hairāñ isī uljhāve meñ dīvāna huā

kaifiyat us kī judā.ī kī na pūchho yaaro

dil tahī ho ke bhī chhalkā huā paimāna huā

haa.e vo lutf-o-karam us ke sitam se pahle

kar ke begāna zamāne se jo begāna huā

roz-e-mahshar na banāyā shab-e-ġham ko ham ne

zikr terā hī bas afsāna dar afsāna huā

karb rāhat hai kabhī aur kabhī rāhat karb

ik muammā ye mizāj-e-dil-e-dīvāna huā

ek mahsūs qarābat kī vo ḳhushbu-e-badan

jis ko chhūne kā tasavvur meñ bhī yārāna huā

kaifiyat dard-e-tamannā kī vahī hai ki jo thī

terā iz.hār-e-vafā bhī dam-e-īsā na huā

jaane kis jān-e-bahārāñ kī lagan hai ki 'salām'

dil sā ma.amūra-e-vahshat kabhī sahrā na huā

kitna hushiyar hua kitna wo farzana hua

teri masti-bhari aankhon ka jo diwana hua

aah ye aalam-e-ghurbat ye shab-e-tanhai

ek qayamat hui dhyan aise mein tera na hua

ek jahan aaj bhi hai us ke tilismon mein asir

sab ka ho kar bhi jo ayyar kisi ka na hua

tujh ko apnane ka yara tha na khone hi ka zarf

dil-e-hairan isi uljhawe mein diwana hua

kaifiyat us ki judai ki na puchho yaro

dil tahi ho ke bhi chhalka hua paimana hua

hae wo lutf-o-karam us ke sitam se pahle

kar ke begana zamane se jo begana hua

roz-e-mahshar na banaya shab-e-gham ko hum ne

zikr tera hi bas afsana dar afsana hua

karb rahat hai kabhi aur kabhi rahat karb

ek muamma ye mizaj-e-dil-e-diwana hua

ek mahsus qarabat ki wo KHushbu-e-badan

jis ko chhune ka tasawwur mein bhi yarana hua

kaifiyat dard-e-tamanna ki wahi hai ki jo thi

tera izhaar-e-wafa bhi dam-e-isa na hua

jaane kis jaan-e-bahaaran ki lagan hai ki 'salam'

dil sa mamura-e-wahshat kabhi sahra na hua