kitne gunjal paD jate hain ek girah suljhane mein

kitne gunjal paḌ jaate haiñ ek girah suljhāne meñ

umr Thikāne lag jaatī hai ret pe phuul banāne meñ

taḳht pe baiThā soch rahā huuñ maar diye haiñ kitne log

qasr ke ūñche do burjoñ par ek alam lahrāne meñ

dhartī ke qadmoñ par merī peshānī kā shamla hai

aur kahāñ tak jhuknā hogā apnā bojh uThāne meñ

tum to shahd utaar ke vāpas aa jaate ho jangal se

kitnī āñkheñ lag jaatī haiñ dard kī aag bujhāne meñ

ab ajdād kī qabreñ khod ke pūchh rahe haiñ maazī se

mustaqbil mahfūz kiyā thā tum ne kis tah-ḳhāne meñ

jismoñ ke arshe par baiTh ke ham ne dariyā paar kiyā

jaane kitne din lag jaate kashtī ke bhar jaane meñ

bāġh-e-baġhāvat mahak uThegā us ko ḳhuun se mat sīñcho

varna dīmak lag jā.egī tāqat ke kāshāne meñ

in bāñhoñ kī guuñj mayassar hai merī ḳhāmoshī ko

phir koī āvāz sunā.ī kaise de vīrāne meñ

ibrat kā juzdān khulā to hairat se halkān hue

kaise kaise ġham bikhre haiñ duniyā ke ḳhas-ḳhāne meñ

apnā aap uñDel diyā hai phir bhī surāhī ḳhālī hai

jaane kis kā jaam bharegā duniyā ke maiḳhāne meñ

kitne gunjal paD jate hain ek girah suljhane mein

umr Thikane lag jati hai ret pe phul banane mein

taKHt pe baiTha soch raha hun mar diye hain kitne log

qasr ke unche do burjon par ek alam lahrane mein

dharti ke qadmon par meri peshani ka shamla hai

aur kahan tak jhukna hoga apna bojh uThane mein

tum to shahd utar ke wapas aa jate ho jangal se

kitni aankhen lag jati hain dard ki aag bujhane mein

ab ajdad ki qabren khod ke puchh rahe hain mazi se

mustaqbil mahfuz kiya tha tum ne kis tah-KHane mein

jismon ke arshe par baiTh ke hum ne dariya par kiya

jaane kitne din lag jate kashti ke bhar jaane mein

bagh-e-baghawat mahak uThega us ko KHun se mat sincho

warna dimak lag jaegi taqat ke kashane mein

in banhon ki gunj mayassar hai meri KHamoshi ko

phir koi aawaz sunai kaise de virane mein

ibrat ka juzdan khula to hairat se halkan hue

kaise kaise gham bikhre hain duniya ke KHas-KHane mein

apna aap unDel diya hai phir bhi surahi KHali hai

jaane kis ka jam bharega duniya ke maiKHane mein