kitne sawal sab ki nigahon mein rakh diye

kitne savāl sab kī nigāhoñ meñ rakh diye

ghar ke sabhī charāġh havāoñ meñ rakh diye

ye inqalāb-e-gardish-e-daurāñ to dekhiye

ajsām kaise kaisī qabāoñ meñ rakh diye

mahfil meñ sher hī nahīñ kuchh raushnī ba-dosh

anvār ham ne dil kī fazāoñ meñ rakh diye

har shaḳhs chāhtā hai ki hoñ us pe āshkār

asrār tū ne kaise gunāhoñ meñ rakh diye

fitrat kā ye sitam bhī hai 'dānish' ajiib chiiz

sar kaise kaise kaisī kulāhoñ meñ rakh diye

kitne sawal sab ki nigahon mein rakh diye

ghar ke sabhi charagh hawaon mein rakh diye

ye inqalab-e-gardish-e-dauran to dekhiye

ajsam kaise kaisi qabaon mein rakh diye

mahfil mein sher hi nahin kuchh raushni ba-dosh

anwar hum ne dil ki fazaon mein rakh diye

har shaKHs chahta hai ki hon us pe aashkar

asrar tu ne kaise gunahon mein rakh diye

fitrat ka ye sitam bhi hai 'danish' ajib chiz

sar kaise kaise kaisi kulahon mein rakh diye