kitni aashaon ki lashen sukhen dil ke aangan mein

kitnī āshāoñ kī lāsheñ sūkheñ dil ke āñgan meñ

kitne sūraj Duub ga.e haiñ chehroñ ke pīle-pan meñ

bachchoñ ke mīThe hoñToñ par pyaas kī sūkhī ret jamī

duudh kī dhāreñ gaa.e ke than se gir ga.iiñ nāgoñ ke phan meñ

registānoñ meñ jalte haiñ paḌe hue sau naqsh-e-qadam par

aaj ḳhirāmāñ koī nahīñ hai ummīdoñ ke gulshan meñ

chaknā-chūr huā ḳhvāboñ kā dilkash dilchasp ā.īna

TeḌhī tirchhī tasvīreñ haiñ TūTe-phūTe darpan meñ

pā-e-junūñ meñ paḌī huī haiñ hirs-o-havā kī zanjīreñ

qaid hai ab tak haath sahar kā tārīkī ke kañgan meñ

āñkhoñ kī kuchh nauras kaliyāñ nīm-shagufta ġhuncha-e-lab

kaise kaise phuul bhare haiñ gulchīnoñ ke dāman meñ

dast-e-ġhaib kī tarah chhupā hai zulm kā haath sitam kā vaar

ḳhushk lahū kī bārish dekhī ham ne kūcha-e-barzan meñ

kitni aashaon ki lashen sukhen dil ke aangan mein

kitne suraj Dub gae hain chehron ke pile-pan mein

bachchon ke miThe honTon par pyas ki sukhi ret jami

dudh ki dhaaren gae ke than se gir gain nagon ke phan mein

registanon mein jalte hain paDe hue sau naqsh-e-qadam par

aaj KHiraman koi nahin hai ummidon ke gulshan mein

chakna-chur hua KHwabon ka dilkash dilchasp aaina

TeDhi tirchhi taswiren hain TuTe-phuTe darpan mein

pa-e-junun mein paDi hui hain hirs-o-hawa ki zanjiren

qaid hai ab tak hath sahar ka tariki ke kangan mein

aankhon ki kuchh nauras kaliyan nim-shagufta ghuncha-e-lab

kaise kaise phul bhare hain gulchinon ke daman mein

dast-e-ghaib ki tarah chhupa hai zulm ka hath sitam ka war

KHushk lahu ki barish dekhi hum ne kucha-e-barzan mein