kitni mushkil hai ki mushkil ki taraf jaana hai

kitnī mushkil hai ki mushkil kī taraf jaanā hai

ḳhud se chal kar mujhe qātil kī taraf jaanā hai

dil ye kahtā hai ki girdāb meñ le chal kashtī

zehn kahtā hai ki sāhil kī taraf jaanā hai

raah dushvār hai to azm salāmat hai mirā

mujh ko har haal meñ manzil kī taraf jaanā hai

mujh se dekhā nahīñ jā.egā taḌapnā jis kā

kyā sitam hai usī bismil kī taraf jaanā hai

baḌhtī jaatī hai musalsal hī ye vahshat dil kī

kyā mujhe tauq-o-salāsil kī taraf jaanā hai

rāhbar hogā na raste meñ luTere hoñge

le ke a.amāl hī manzil kī taraf jaanā hai

manzil-e-karb-o-balā is se hai aage 'ahsan'

lauT jaa.e jise bātil kī taraf jaanā hai

kitni mushkil hai ki mushkil ki taraf jaana hai

KHud se chal kar mujhe qatil ki taraf jaana hai

dil ye kahta hai ki girdab mein le chal kashti

zehn kahta hai ki sahil ki taraf jaana hai

rah dushwar hai to azm salamat hai mera

mujh ko har haal mein manzil ki taraf jaana hai

mujh se dekha nahin jaega taDapna jis ka

kya sitam hai usi bismil ki taraf jaana hai

baDhti jati hai musalsal hi ye wahshat dil ki

kya mujhe tauq-o-salasil ki taraf jaana hai

rahbar hoga na raste mein luTere honge

le ke aamal hi manzil ki taraf jaana hai

manzil-e-karb-o-bala is se hai aage 'ahsan'

lauT jae jise baatil ki taraf jaana hai