kitni sadiyan na-rasi ki intiha mein kho gain

kitnī sadiyāñ nā-rasī kī intihā meñ kho ga.iiñ

be-jahat nasloñ kī āvāzeñ ḳhalā meñ kho ga.iiñ

rañg-o-bū kā shauq āshob-e-havā meñ le gayā

titliyāñ ghar se nikal kar ibtilā meñ kho ga.iiñ

kaun pas-manzar meñ ujḌe paikaroñ ko dekhtā

shahr kī nazreñ libās-e-ḳhushnumā meñ kho ga.iiñ

muntazir chaukhaT pe ta.abīroñ ke shahzāde rahe

ḳhvāb kī shahzādiyāñ qasr-e-duā meñ kho ga.iiñ

saañp ne un ke nasheman meñ baserā kar liyā

peḌ se chiḌiyoñ kī mahkāreñ fazā meñ kho ga.iiñ

koī kyā bāb-e-amāñ āfat-zadoñ par kholtā

dastakeñ gulzār tūfāñ kī sadā meñ kho ga.iiñ

kitni sadiyan na-rasi ki intiha mein kho gain

be-jahat naslon ki aawazen KHala mein kho gain

rang-o-bu ka shauq aashob-e-hawa mein le gaya

titliyan ghar se nikal kar ibtila mein kho gain

kaun pas-manzar mein ujDe paikaron ko dekhta

shahr ki nazren libas-e-KHushnuma mein kho gain

muntazir chaukhaT pe tabiron ke shahzade rahe

KHwab ki shahzadiyan qasr-e-dua mein kho gain

sanp ne un ke nasheman mein basera kar liya

peD se chiDiyon ki mahkaren faza mein kho gain

koi kya bab-e-aman aafat-zadon par kholta

dastaken gulzar tufan ki sada mein kho gain