kitni tarkiben kin baatin ke liye

kitnī tarkībeñ kiiñ bātin ke liye

nuun sākin miim sākin ke liye

mere apne mujh se jab barham hue

maiñ rahūñ zinda bhalā kin ke liye

yā ḳhudā us ke sabhī ġham duur ho

maiñ duā kartī huuñ mohsin ke liye

pūchhte ho ham se hai islām kyā

haq pe chalnā farz momin ke liye

gardish-e-ayyām ne toḌe sitam

vaqt ne badle bhī gin gin ke liye

bijliyoñ ne phir jalāyā āshiyāñ

maiñ ne phir se choñch meñ tinke liye

ain mumkin hai miTā duuñ mas.ale

bas pareshānī hai lekin ke liye

un ko mujh se vāsta kuchh bhī nahīñ

ḳhaak kar dī zindagī jin ke liye

aaj ke is daur meñ jiinā sazā

jaane kyoñ zinda haiñ kis din ke liye

is jahāñ meñ kuchh bhī ho saktā hai ab

haiñ khule dar ġhair-mumkin ke liye

in savāloñ par mere vo chup rahā

thī mujhe ummīd jin jin ke liye

umr bhar 'shahnāz' ummīd-e-sahar

merā sūraj chhup gayā din ke liye

jin pe ham marte rahe 'shahnāz' vo

kahte haiñ zinda ho kis din ke liye

kitni tarkiben kin baatin ke liye

nun sakin mim sakin ke liye

mere apne mujh se jab barham hue

main rahun zinda bhala kin ke liye

ya KHuda us ke sabhi gham dur ho

main dua karti hun mohsin ke liye

puchhte ho hum se hai islam kya

haq pe chalna farz momin ke liye

gardish-e-ayyam ne toDe sitam

waqt ne badle bhi gin gin ke liye

bijliyon ne phir jalaya aashiyan

main ne phir se chonch mein tinke liye

ain mumkin hai miTa dun masale

bas pareshani hai lekin ke liye

un ko mujh se wasta kuchh bhi nahin

KHak kar di zindagi jin ke liye

aaj ke is daur mein jina saza

jaane kyon zinda hain kis din ke liye

is jahan mein kuchh bhi ho sakta hai ab

hain khule dar ghair-mumkin ke liye

in sawalon par mere wo chup raha

thi mujhe ummid jin jin ke liye

umr bhar 'shahnaz' ummid-e-sahar

mera suraj chhup gaya din ke liye

jin pe hum marte rahe 'shahnaz' wo

kahte hain zinda ho kis din ke liye