kiya jo etibar un par mariz-e-sham-e-hijran ne

kiyā jo e'tibār un par marīz-e-shām-e-hijrāñ ne

ThanDā.ī meñ dhatūrā de diyā īsā-e-daurāñ ne

phirāyā dar-ba-dar un ko jahāñbānī ke armāñ ne

nachāyā ḳhuub ye bandar junūn-e-fitna-sāmāñ ne

fujūr-o-fisq kī tārīkiyoñ meñ jab koī bhaTkā

dikhā.ī duur se hī us ko light us ke īmāñ ne

sakūñ miltā hai un ko aur na ham ko chain rātoñ ko

pareshāñ kar rakhā hai aap ke hāl-e-pareshāñ ne

na hai ye kaam vahshat kā na harkat dast-e-vahshat kī

galā ghoñTā hai dīvāne kā ḳhud us ke garebāñ ne

phirā kar dar-ba-dar chunvā.e tinke raat din un se

banāyā bevaqūf achchhā junūn-e-fitna-sāmāñ ne

dayār-e-dost meñ ushshāq bechāre jahāñ baiThe

pakaḌ kar kaan uThāyā ḳhāk-rūb-e-kū-e-jānāñ ne

guloñ meñ rañg-o-bū hai aur na ġhunchoñ meñ tabassum hai

bahāreñ gulsitāñ kī bech liiñ ahl-e-gulistāñ ne

janāb-e-nāseh-e-mushfiq nasīhat jab lage karne

dikhā.ī choñch hañs hañs kar unheñ chāk-e-garebāñ ne

kiya jo e'tibar un par mariz-e-sham-e-hijran ne

ThanDai mein dhatura de diya isa-e-dauran ne

phiraya dar-ba-dar un ko jahanbani ke arman ne

nachaya KHub ye bandar junun-e-fitna-saman ne

fujur-o-fisq ki tarikiyon mein jab koi bhaTka

dikhai dur se hi us ko light us ke iman ne

sakun milta hai un ko aur na hum ko chain raaton ko

pareshan kar rakha hai aap ke haal-e-pareshan ne

na hai ye kaam wahshat ka na harkat dast-e-wahshat ki

gala ghonTa hai diwane ka KHud us ke gareban ne

phira kar dar-ba-dar chunwae tinke raat din un se

banaya bewaquf achchha junun-e-fitna-saman ne

dayar-e-dost mein ushshaq bechaare jahan baiThe

pakaD kar kan uThaya KHak-rub-e-ku-e-jaanan ne

gulon mein rang-o-bu hai aur na ghunchon mein tabassum hai

bahaaren gulsitan ki bech lin ahl-e-gulistan ne

janab-e-naseh-e-mushfiq nasihat jab lage karne

dikhai chonch hans hans kar unhen chaak-e-gareban ne