koft se jaan lab pe aai hai

koft se jaan lab pe aa.ī hai

ham ne kyā choT dil pe khaa.ī hai

likhte ruqa likhe ga.e daftar

shauq ne baat kyā baḌhā.ī hai

aarzū us buland o baalā kī

kyā balā mere sar pe laa.ī hai

dīdanī hai shikastagī dil kī

kyā imārat ġhamoñ ne Dhaa.ī hai

hai tasanño ki laal haiñ ve lab

yaanī ik baat sī banā.ī hai

dil se nazdīk aur itnā duur

kis se us ko kuchh āshnā.ī hai

be-sutūñ kyā hai kohkan kaisā

ishq kī zor āzmā.ī hai

jis maraz meñ ki jaan jaatī hai

dilbaroñ hī kī vo judā.ī hai

yaañ hue ḳhaak se barābar ham

vaañ vahī naaz o ḳhud-numā.ī hai

aisā mautā hai zinda-e-jāved

rafta-e-yār thā jab aa.ī hai

marg-e-majnūñ se aql gum hai 'mīr'

kyā divāne ne maut paa.ī hai

koft se jaan lab pe aai hai

hum ne kya choT dil pe khai hai

likhte ruqa likhe gae daftar

shauq ne baat kya baDhai hai

aarzu us buland o baala ki

kya bala mere sar pe lai hai

didani hai shikastagi dil ki

kya imarat ghamon ne Dhai hai

hai tasanno ki lal hain we lab

yani ek baat si banai hai

dil se nazdik aur itna dur

kis se us ko kuchh aashnai hai

be-sutun kya hai kohkan kaisa

ishq ki zor aazmai hai

jis maraz mein ki jaan jati hai

dilbaron hi ki wo judai hai

yan hue KHak se barabar hum

wan wahi naz o KHud-numai hai

aisa mauta hai zinda-e-jawed

rafta-e-yar tha jab aai hai

marg-e-majnun se aql gum hai 'mir'

kya diwane ne maut pai hai