kohsar-e-hunar mujhse abhi sar na hua tha

kohsār-e-hunar mujh se abhī sar na huā thā

maiñ chāk-e-garebāñ kā rafū-gar na huā thā

dīvār kī tahrīr ne koshish to bahut kī

āmoḳhta aksar mujhe azbar na huā thā

duniyā ke liye mujh meñ kashish kis liye hotī

gardish meñ rahā maiñ kabhī mehvar na huā thā

ma.alūm use ḳhuub the ik sar ke masārif

dīvār banā shaḳhs kabhī dar na huā thā

us ke to makāñ jaise ḳhad-o-ḳhāl nahīñ the

jab tak ki yahī dasht mirā ghar na huā thā

dāroġha-e-ġham ḳhuub nazar rakhte the lekin

ik sāneha is dil pe muqarrar na huā thā

har niiñd ke pahlū meñ ka.ī phuul the lekin

ta.abīr se har ḳhvāb mo.attar na huā thā

is baar sitāroñ ne bhī 'atiyāt diye the

is baar magar chāñd munavvar na huā thā

kohsar-e-hunar mujh se abhi sar na hua tha

main chaak-e-gareban ka rafu-gar na hua tha

diwar ki tahrir ne koshish to bahut ki

aamoKHta aksar mujhe azbar na hua tha

duniya ke liye mujh mein kashish kis liye hoti

gardish mein raha main kabhi mehwar na hua tha

malum use KHub the ek sar ke masarif

diwar bana shaKHs kabhi dar na hua tha

us ke to makan jaise KHad-o-KHal nahin the

jab tak ki yahi dasht mera ghar na hua tha

darogha-e-gham KHub nazar rakhte the lekin

ek saneha is dil pe muqarrar na hua tha

har nind ke pahlu mein kai phul the lekin

tabir se har KHwab moattar na hua tha

is bar sitaron ne bhi 'atiyat diye the

is bar magar chand munawwar na hua tha