koi aankh chupke chupke mujhe yun nihaarti hai

koī aañkh chupke chupke mujhe yuuñ nihārtī hai

mire dil meñ ik tamannā kahīñ sar ubhārtī hai

mirī soch kā tarīqa mirī aañkh kā salīqa

yahī shai hai tere andar jo tujhe sañvārtī hai

na.e shauq kī chamak hai kisī mehmāñ nazar meñ

mirī ruuh meñ utar kar mire sar ubhārtī hai

mujhe kuchh dinoñ se us se baḌā pyaar mil rahā hai

kabhī apne dil ko vaare kabhī jaan hārtī hai

kabhī juuḌā khol denā kabhī phir se bāñdh lenā

mujhe shak sā ho chalā hai vo mujhe ubhārtī hai

koī guuñj ban ke ab tak vo hai jism-o-jāñ se lipTī

ki Thahar Thahar ke ab bhī vo mujhe pukārtī hai

ghane ho ga.e ziyāda jahāñ chāñdnī ke saa.e

usī dāman-e-shajar meñ vo mujhe pukārtī hai

nayā husn dekhtā huuñ ḳham-e-shāḳh-e-har-shajar par

ye bahār apne tan se jo libās utārtī hai

ka.ī saal kī mohabbat magar aaj bhī vahī hai

ki maiñ ik sharīr bachcha vo mujhe sudhārtī hai

baḌī der se huuñ lauTā mujhe ye batāo logo

mirī aarzū kā dāman vo kahāñ pasārtī hai

jo marā hai hādse meñ mirā us se kyā thā rishta

ye saḌak jo ḳhuuñ meñ tar hai mujhe kyuuñ pukārtī hai

koi aankh chupke chupke mujhe yun nihaarti hai

mere dil mein ek tamanna kahin sar ubhaarti hai

meri soch ka tariqa meri aankh ka saliqa

yahi shai hai tere andar jo tujhe sanwarti hai

nae shauq ki chamak hai kisi mehman nazar mein

meri ruh mein utar kar mere sar ubhaarti hai

mujhe kuchh dinon se us se baDa pyar mil raha hai

kabhi apne dil ko ware kabhi jaan haarti hai

kabhi juDa khol dena kabhi phir se bandh lena

mujhe shak sa ho chala hai wo mujhe ubhaarti hai

koi gunj ban ke ab tak wo hai jism-o-jaan se lipTi

ki Thahar Thahar ke ab bhi wo mujhe pukarti hai

ghane ho gae ziyaada jahan chandni ke sae

usi daman-e-shajar mein wo mujhe pukarti hai

naya husn dekhta hun KHam-e-shaKH-e-har-shajar par

ye bahaar apne tan se jo libas utarti hai

kai sal ki mohabbat magar aaj bhi wahi hai

ki main ek sharir bachcha wo mujhe sudhaarti hai

baDi der se hun lauTa mujhe ye batao logo

meri aarzu ka daman wo kahan pasarti hai

jo mara hai hadse mein mera us se kya tha rishta

ye saDak jo KHun mein tar hai mujhe kyun pukarti hai