koi baat aisi aaj ai meri gul-ruKHsar ban jae

koī baat aisī aaj ai merī gul-ruḳhsār ban jaa.e

ki bulbul bātoñ bātoñ meñ dam-e-guftār ban jaa.e

ayaañ ho jazb-e-shauq aisā hasīñ aa.eñ ziyārat ko

mirī turbat kā mela misr kā bāzār ban jaa.e

mire hañsne pe vo kahte haiñ aisā bhī na ho be-ḳhud

ki koī aadmī se qahqaha dīvār ban jaa.e

ta.ajjub kuchh nahīñ hai gar vafūr-e-soz-e-furqat se

mirā har mū-e-tan minqār-e-mausīqār ban jaa.e

Tahalte gar chale aa.eñ vo dāġhoñ ke tamāshe ko

abhī sarv-e-charāġhāñ merā jism-e-zār ban jaa.e

barahman shaiḳh ko kar de nigāh-e-nāz us but kī

gulū-e-zohd meñ tār-e-nazar zunnār ban jaa.e

agar ghar se ba-qasd-e-sair nikle vo kamāñ-abrū

to bahr-e-tā.ir-e-dil har mizha sūfār ban jaa.e

tabassum kar tamāshā dekh ke vahshat kā phir zālim

mirā chāk-e-garebāñ zaḳhm-e-dāman-dār ban jaa.e

yūñhī hañs hañs ke tum āshiq kā ronā dekhte jaao

ki har tār-e-nazar ik motiyoñ kā haar ban jaa.e

baḌhāo manzilat teġh adā kī tund-ḳhūī se

munāsib hai jo ye shamshīr jauhar-dār ban jaa.e

agar ā.īna-e-dil saaf ho husn-e-tavajjoh se

har ik āñkhoñ kā parda parda-e-asrār ban jaa.e

yahī hai ḳhūñ-bahā chal kar zarā kah do ishāre se

'habīb-e-ḳhasta kā marqad pas-e-dīvār ban jaa.e

koi baat aisi aaj ai meri gul-ruKHsar ban jae

ki bulbul baaton baaton mein dam-e-guftar ban jae

ayan ho jazb-e-shauq aisa hasin aaen ziyarat ko

meri turbat ka mela misr ka bazar ban jae

mere hansne pe wo kahte hain aisa bhi na ho be-KHud

ki koi aadmi se qahqaha diwar ban jae

tajjub kuchh nahin hai gar wafur-e-soz-e-furqat se

mera har mu-e-tan minqar-e-mausiqar ban jae

Tahalte gar chale aaen wo daghon ke tamashe ko

abhi sarw-e-charaghan mera jism-e-zar ban jae

barahman shaiKH ko kar de nigah-e-naz us but ki

gulu-e-zohd mein tar-e-nazar zunnar ban jae

agar ghar se ba-qasd-e-sair nikle wo kaman-abru

to bahr-e-tair-e-dil har mizha sufar ban jae

tabassum kar tamasha dekh ke wahshat ka phir zalim

mera chaak-e-gareban zaKHm-e-daman-dar ban jae

yunhi hans hans ke tum aashiq ka rona dekhte jao

ki har tar-e-nazar ek motiyon ka haar ban jae

baDhao manzilat tegh ada ki tund-KHui se

munasib hai jo ye shamshir jauhar-dar ban jae

agar aaina-e-dil saf ho husn-e-tawajjoh se

har ek aankhon ka parda parda-e-asrar ban jae

yahi hai KHun-baha chal kar zara kah do ishaare se

'habib-e-KHasta ka marqad pas-e-diwar ban jae